GIG Motors Pro Volleyball League chu Jun 9, Zirtawp zan khan R Dengthuama Indoor Stadium Mualpuiah League round hnuhnungber khelh a ni a, Ramhlun Sporting Club chuan 3-1in 3rd MAP an hneh.
Hmeichhia hian June ni 10, Inrinni zanah an khel ang a, League round inkhel hnuhnung ber tur a ni dawn a ni.
Mipa Semifinal lut te: 1. Chhinga Veng 2. TNT, Muanna Veng 3. Hunthar Veng 4. Ramhlun Sporting Club
Ramhlun Sporting Club 3-1 3rd MAP
(20-25, 25-21, 25-22, 25-17)
3rd MAP hian Set hmasa ber la mahse, Ramhlun Sporting Club an hneh lo a, semifinal lut pha lovin an tla ta a ni.
Chak mamawh MAP-in bul an tan fuh hle a, harsatna lian tham tawk lovin 25-20 in set an la. Mahse, set hnihna atangin R Dengthuama Indoor Stadium, Mualpuiah boruak a inthlak a, RSC-in inkhel an thunun zui.
Mipa team tha panga inel zinga Mizo hlang awm chhun Police-in theihtawpin bei let mah se RSC an ding nghet a, Suresh Chandra Khoiwal Vicky leh Hafeel VP chuan team tanpuiin set thum an la zawn.
League vawi li an khelhah a tum hnih nan Ramhlun North team an chak a, point ruk hmuin pathumna ni chungin an tlang. Kar leh nilaini zanah pahnihna Hunthar nen semifinal an khel ang.
A vawi hnih nan Vicky chuan LG D3 Player of the Night trophy a dawng a, point 28 hmuin 16 a hloh. Hafeel chuan 22 hlawhin 12 a paih ve thung a, an pahnih tih loha RSC tana che tha ber R Lalnunmawia'n point riat thawk chhuakin vawi nga a tisual.
MAP-in vawi li an khelhah chak an nei miah lo va, point hnih hmuin table mawngah an awm. RSC hneh se tlang thei an nih laiin point khatin palina TNT an pha lo va, nikum khan team paruk inel zingah palina niin kuminah an tlahniam.
RSC-in semifinal lut sa chungin an khel a, an inlan hnuhnun ber Hunthar hneh lovin 1-3 in an tlawm. Police hmaah pathumna ni turin chak an mamawh a, chiai takin bul an tan. Thawhhona tha tak nena khel Police tan Lalruatfela Sailo chuan point sarih hmuin set hmasa ber an la.
MAP an chak chuan TNT an tla dawn a, palinaah RSC an tlahniam bawk ang. Set hnihna atangin Ramhlun North team an insiam tha a, nung takin an khel. Police tanhmun a phet a, set thumnaah nawt let ngial mah se point 22-ah an tawp a, set hmasa aiin point khatin an hmu tam.
Set hnih an hloh zawn hnuah MAP an derthawng. Hun khirh tak atangin an tal chhuak thei lo va, an hnungtawlh zel. RSC-in nuam ti takin an khel tha telh telh a, Vicky chuan point 12 thawk chhuakin awlsam takin an tlang.
MAP-in khel chhe lo mah se team nawr kal thei innghahna tling an nei tawk lo va, a pumpuia thlirin RSC an el pha lo deuh. Point hmu tam ber Ruafela'n 14 thawk chhuakin point nga a hloh va, captain Lalduhsanga'n 18 hlawhin tum riat a tisual a, Joel Zodinsanga'n 11 hmuin point ruk a paih.
Hmeichhia June 10, Inrinni zan dar 8:00 PM Fixtures
Hmeichhia: Durtlang vs Electric Veng
Mipa Semifinal Fixtures Jun 13, Thawhleh zan dar 8:00 PM
Chhinga Veng vs TNT, Muanna Veng
Jun 14, Nilai zan 8:00 PM
Hunthar Veng vs Ramhlun Sporting Club