GIG Motors Pro Volleyball League chu June ni 13, Thawhlehni zan khan R Dengthuama Indoor Stadium, Mualpuiah semifinal khelh a ni a, Chhinga Veng chuan 3-0 a TNT hnehin GIG Motors Pro Volleyball League final an lut ta a ni.
Chhinga Veng 3-0 TNT
(25-17, 25-21, 25-18)
Club pahnih te hi league round-ah intawng tawhin Chhinga Veng hian set hloh lovin an hneh tawh a, semifinal-ah hian Muanna Veng team-in thil danglam an thlentir zo chuang lo.
Rin kai Chhinga Vengin vawi nga an khelh tawhah set hloh lovin hnehna an chang fai vek. Kar leh thawhlehni zanah league-a an hneh tawh ve ve Hunthar emaw Ramhlun Sporting Club emaw nen final-ah an intum ang.
Chhinga Veng tan Gurinder Singh chuan point 27 hmuin vawi riat a tisual a, a vawi hnih nan LG D3 Player of the Night trophy a dawng. India captain hlui hian set thumnaah point hloh lovin 12 a thawk chhuak.
TNT-in hmasawn tumin a tir atangin an bei a, 6-4 in an sang hman. Mahse, rei lo te hnuah Chhinga Vengin inkhel an thunun a, 23-17 atangin an tlang.
Set hnihnaah Laldensanga leh Lallungmuana'n team tanpuiin TNT-in beiseina nen theihtawp an chhuah a, 15-15 thlengin an inbei tawk hle. Hun pawimawhah Chhinga Vengin team tha zawk an nihna an lantir chiang viau.
Mandeep Singh chuan set thum an inbeih chhungin point 17 a hmu a, vawi thum a tisual. Set hnihna bikah point 12 thawk chhuakin point hnih a hloh a, a langsar. An inkhelh chhunga TNT chet that ber ni mah se point 21-ah an tawp.
Tlakhniam nei lovin Chhinga Veng an mar tluan a, TNT an hnungtawlh ve thung. Gurinder leh Mandeep chuan khawi lai atang pawhin an vaw tla thei a, TNT-in boruak sangah innghahna tling player an kawl ve lo.
David Lalramhmachhuana ball vawrh tha tak chu captain Lalrinchhana Renthlei chuan a hlap tla a, 25-18 in Chhinga Veng an tlang. Set 15 an lak zawnna niin hloh an la nei lo va, PVL chanchina set hloh lova kal tluang rei ber an ni.
TNT-in awmze nei thamin hmasawnna an lantir zo lo. Nikumah Mizo hlangin final an lut a, kuminah semifinal pal tlang zo lovin vawi nga an khelhah tum khat chiah an chak a, 3-2 in 3rd MAP an hneh.
Muanna Veng team tan mi mala che tha ber Densanga'n point 10 hmuin point thum a hloh. Jatin Singh chuan point sarih thawk chhuakin tum nga a tisual a, Lungmuana'n vawi nga vaw tlain point khat a paih.
Chhinga Vengin final an luh thlengin fiahna tling inkhel harsa leh khirh, talbuaina khawp an hmachhawn lo. State dang atanga an lak luh player pahnih bakah Mizo player-ten nuam ti takin an khel a, Chhantea bakah Lalngilneia leh Lallianmawia Pachuan chuan inrintawkna an nei sang telh telh.
(adsbygoogle = window.adsbygoogle || []).push({});