Pro Volleyball League khuhhawn a ni

24th May 2017, 06:05PM

Mizoram volleyball inelna sang ber GIG Motors Pro Volleyball League khel tur team pariat an inpeih tawh a,  May ni 23, Thawhleh zan khan LPS Auditorium, Zarkawtah Mizoram State Sports Council Secretary Pu C Laltlanthanga'n ball bengin inelna hlawhtling leh ropui a nih ngei beiseiin a hawng.

script async src="//pagead2.googlesyndication.com/pagead/js/adsbygoogle.js">

(adsbygoogle = window.adsbygoogle || []).push({});

Pu Tlana chuan : "Volleyball hi Mizote khelh chi a ni lo ang kan ti țhin. Mahse, volleyball player lian tak tak kan nei a, kan khelh chi tak a ni mek a, a ni chho zel ang tih ka ring," a ti.

Pro Volleyball 'spike-off' inkhawma khuallian Pu Tlana chuan Ramhlunah volleyball stadium tur ruahman mek a ni a, tun ațanga rei lo teah peih fel a ni ngei a ring bawk.

Pro Volleyball title sponsor GIG Motors leh sponsor dangte chu Mizoram infiamna kawnga an neih sum an thawh avangin lawmthu a hrilh a, sumdawngte hi infiamna tihmasawntu pawimawh an ni tiin a sawi.

Title sponsor GIG Motors neitu Pu John Lalpeka leh Mizoram Volleyball Association President Dr Lalmalsawma'n thu an sawi bawk a, tun tum Pro Volleyball-ah hian hmasawnna thar hmuh tur a awm nual dawn niin Pu Mala chuan a sawi.

Team tinin inkhel boruak siamtu tur cheerleader's an nei vek dawn a, Organising Committee chuan cheerleader's tanpui nan team tin hnenah Rs 5,000 theuh a pe a ni.

Pro Volleyball 2-ah hian mipa team tha panga - TNT, Hunthar, 3rd MAP, Chhinga Veng leh Ramhlun Sporting Club (RSC) bakah a vawi khat nan hmeichhe inelna telh a ni a, champion hmasa ber nih tumin team thum - Power Department Sporting Club, Electric Veng leh Durtlang an inel ang.

Ningani zanah league tan a ni dawn a, Chhinga Veng leh RSC-in R Dengthuama Indoor Stadium-ah dar 8 atangin an khel ang.

Chhinga Veng leh RSC hian Pro Volleyball an khelh vawi khatna tur ve ve a ni. Chutih rualin Chhinga Vengin rin an kai a, tun season atangin Pro League division-ah awm chauh mah se tournament hnuhnung ber MVA Invitation-ah chiang takin an champion.

Chhinga Veng hian Mizo player tha bakah squad tihchak nan state pawn atangin mi pathum an chaw lut. An lak luh zinga pahnih universal player Gurinder Singh leh spiker Mandeep Singh chuan ngaihven an hlawh zual a, India international player ve ve niin Gurinder hi 2004-2007 chhungin India captain a ni nghe nghe.

Pro Volleyball play-off paltlang zo lovin RSC an tla a, team dangin harsatna an tawh avangin hun tepterah lak luh zui leh an ni. An duhthalin inbuatsaihna nei tha lo mah se team tha hlun leh hriat hlawh thin RSC-in beiseina sang tak nen an khel dawn.

Team tha ber pawl tura ngaih Chhinga Veng hmaah an dinhmun a lang chiang nghal viau dawn a, an tan fiahna a ni ang. RSC hian squad tihchak nan Kerala Police pahnih an ziak lut a, mahse, pakhat zawkin rokhawlhna a neih leh tak avangin universal player VP Hafeel chiah an chhawr thei dawn a ni.

International referee Thokchom Romeo Singh chuan league tan a nih rualin a hna a thawk tan ve nghal dawn a, inkhel zawng zawng vawi 17 a ham vek ang.

A hmuna en duh tan Pro Volleyball-ah en man siam nghal a ni dawn lo va, a thlawnin en theih a ni ang. Organising Committee chuan en turin mipui a sawm a ni.

GIG Motors Pro Volleyball League fixture

May 25, 2017 (Ningani) :

Chhinga Veng v Ramhlun Sporting Club (Mipa)

May 26, 2017 (Zirtawpni) :

3rd MAP v TNT (Mipa)

May 27, 2017 (Inrinni) :

Hunthar v Chhinga Veng (Mipa)

May 30, 2017 (Thawhlehni)

Power v Electric Veng (Hmeichhia)

May 31, 2017 (Nilaini) :

TNT v Hunthar (Mipa)

Jun 1, 2017 (Ningani) :

Chhinga Veng v 3rd MAP (Mipa)

Jun 2, 2017 (Zirtawpni) 

Ramhlun Sporting Club v TNT (Mipa)

Jun 3, 2017 (inrinni) : Hunthar v 3rd MAP (Mipa)

Jun 6, 2017 (Thawhlehni) 

Durtlang v Power (Hmeichhia)

Jun 7, 2017 (Nilaini) 

Ramhlun Sporting Club v Hunthar (Mipa)

June 8, 2017 (Ningani) :

TNT v Chhinga Veng (Mipa)

Jun 9, 2017 

3rd MAP v Ramhlun Sporting Club (Mipa)

Jun 10, 2017 (Inrinni) :

Electric Veng v Durtlang (Hmeichhia)

SEMIFINAL - MIPA

Jun 13, 2017 (Thawhlehni)

League-a pakhatna v League-a palina

Jun 14, 2017 (Nilaini)

League-a pahnihna v League-a pathumna

FINAL

Hmeichhia

Jun 16, 2017

Mipa

Jun 20, 2017

Inkhel zawng zawng hi zan dar 8-ah vek țan tura ruahman a ni a, LPS 1-ah live telecast-a pek chhuah vek a ni ang

LAWMMAN

MIPA

Pakhatna : Rs 1,00,000 & trophy

Pahnihna : Rs 60,000

Semifinalist (2) : Rs 35,000

Pangana : Rs 20,000

HMEICHHIA

Pakhatna : Rs 50,000 & trophy

Pahnihna : Rs 30,000

Pathumna : Rs 10,000

League inkhel bikah match money - a chakin Rs 1,000 leh a chak lovin Rs 500 an dawng ang.

 Inkhel apiangah player tha ber leh fan tha ber (mi mal) thlan a ni ang a, lawmman pawisa fai pek a ni ang.

Mipa leh hmeichhe team tin hnenah cheerleader's țanpuina Rs 5,000 țheuh pek a ni.

script async src="//pagead2.googlesyndication.com/pagead/js/adsbygoogle.js">

(adsbygoogle = window.adsbygoogle || []).push({});

Copyright © inkhel.com 2024. All rights reserved.