GIG Motors Pro Volleyball League Hmeichhia final chu June ni 16, Zirtawp zan khan R Dengthuama Indoor Stadium, Mualpui khelh a ni a, Power Department Sporting Club chuan 3-1 a Electric Veng hnehin an champion ta a ni.
Power Department Sporting Club 3-1 Electric Veng
( 13-25, 25-15, 25-21, 25-16 )
Power hian set khatna Chiang taka an hloh hnuah ropui takin Power-in an bei let a, set thum la zawnin Pro Volleyball League hmeichhe champion hmasa ber an ni.
League-ah Power-in 3-2 in Electric an hneh tawh a, final-ah a hma aia chiangin an chak a, phu takin an champion. Captain Vardingliani chuan point 19 hmuin point riat a hloh a, hnehna an chan theih nan RK Lalfakmawii'n point 11 thawk chhuakin vawi nga a tisual.
Preeti Singh chuan Electric Veng chakpui zo lo mah se point 25 hlawhin point kua a paih a, LG D3 Player of the Night trophy a dawng.
Champion Power-in Rs 50,000 leh trophy bakah match money Rs 2,000 an dawng. Pahnihna Electric kutah Rs 30,000 leh match money Rs 1,500 hlan a nih bakah pathumna Durtlangin Rs 10,000 leh match money Rs 1,000 an la.
Power-in champion turin set 12 an khel a, hetih chhung hian India aiawha feh chhuak tawh Dingi'n point 72 hlawh chhuakin 27 a paih a, KT Panasonic Best Player trophy dawngin Rs 3,000 a keng tel. Durtlang player F Lalparmawii kutah KT Panasonic Best Emerging Player trophy leh Rs 2,000 hlan a ni bawk.
Hmeichhe final-a khuallian Pi Vanlalawmpuii Chawngthu, MLA chuan team inel pathum hnenah cosco volleyball pakhat theuh a pe. Pi Awmpuii hian thu sawiin sorkarin infiamna hmunhma tha tak a buatsaih hi thalaite tan a ropui a, thalaite hmakhua a eng hle a ni a ti. Mizo hmeichhe infiammite an intipa mai thin chu a vei hle tih sawiin, Pathianin min siam dan anga awm hi a pawimawh em em a ni, a ti.
pic: Johny Ngurthansanga
(adsbygoogle = window.adsbygoogle || []).push({});