July ni 6, Ningani Pro Volleyball playoff final khelh a ni a, Electric Veng team Anastasia chuan Sports and Youth Services team 3-1 a hnehin season tharah Mizoram volleyball inelna sang ber an khel thei dawn ta a ni. 

R Dengthuama Indoor Stadium, Mualpuiah ni li chhungin Pro Division hmun ruak pakhat inchuhin team 13 an inel a, Electric Veng team Anastasia chuan final-ah 3-1 (25-21,22-25,25-18,25-23) in SYS an hneh.

Season khat an awl hnuah Anastasia hian Pro Volleyball an khel leh thei dawn a, 2016 khan a vawi khat nan Pro Volleyball buatsaih niin Anastasia an champion a, team inrelbawlna lamah harsatna an tawh avangin club an tinung zui lo va, June thla khan 2016 Pro Volleyball champion Anastasia tel lovin Pro Volleyball vawi hnihna khelh a ni a, Hunthar Veng an champion thung a ni.

Anastasia hian Mizoram volleyball inelna sang berah a vawi hnih nan champion tumin bul an tan tha hle a, nikuma trophy an lak theihna kawnga thawh hlawk tak leh Pro Volleyball best player Shiva Thapa ko kirin Mizo player thate nen play-off an paltlang.

Electric Veng team hian ninganiah inkhel vawi hnih hmachhawnin semifinal-ah 25-21, 25-20, 25-23, 25-20 in College Veng an hneh. Final-ah SYS nen an inbeitawk hle a, Shiva chuan team tanpuiin set li an inkhelh hnuah hnehna hlu tak a chanpui ta a ni.

Mizoram Volleyball Association chuan season tharah mipa Pro Division-ah team ruk awm turin ruahmanna a siam a, thla liam taa khelh zawh tak Pro Volleyball-a tel team pangate chu tling sa an ni a, Anastasia-in Hunthar, Chhinga Veng, TNT, Ramhlun Sporting Club leh 3rd MAP zuiin division sang berah inelna an hmachhawn dawn a ni.