Premier League khelh mekah record thar a awm belh nual a, season a tawp tep tawh a, a dang pawh awm belh thei a la ni reng a. Heng zinga thenkhat hi chu khum leh theih mai tura ngaih a awm laiin, khum harsa tur thenkhat pawh a awm ve hlawm.
Alan Shearer-a goal thun zat 260 thun tling thei nih chu thil huphurhawm tak tur niin, Ryan Giggs-a assist zat, vawi 162 tluk phak leh Petr Cech-a vawi 159 clean sheet neih zat neih ve te chu a zuamawm zawk zawk lo hle a. Hetih rual hian heng record te hi khum theih loh erawh an ni hauh lo a. Heng aia khum huphurhawm zual panga te hi han bih chiang hlawm ila.
5. Red card hmu rang ber - Steven Gerrard
Liverpool captain Steven Gerrard kan hria a, a tang lutuk tal vel vangin card pawh a hmuh phah nasa thin tih kan hre chiang hlawm ang a. Brendan Rodgers hun laiin Liverpool leh Manchester United an inkhel a, Liverpool hi 0-1 in an chak lo zawk rih a.
Second half an khel tan leh a, Gerrard chuan boruak a thlak danglam theih beiseiin an luhtir a. A luh atanga second 38 chauhah Ander Herrera a tlawh a, hei vang hian referee Martin Atkinson chuan Gerrard hi red card pein a hnawtchhuak nghal a. Khelmual luh hnua hei aia red card hmu rang hi sawi tur a la awm rih lo.
4. Goal thun hla ber - Asmir Begovic
He goal hi Premier League bikah chauh ni loin, goal thun tawh zawng zawngah chuan a thunna a la hla ber a, hei kher hi chu khum a harsa viau dawn a ni.
Tuna Bournemouth goalkeeper ni mek Asmir Begovic hian Stoke City goalkeeper a nih laiin he goal turu zet mai hi a thun a. November 11, 2013 khan Southampton nen an inkhel a, second 13 chauh a la awm a, si khat an la phur zui a.
Bosnia goalkeeper Begovic hian ball a man a, ball chu Southampton goal lamah chuan na deuhin a pet phei vak mai a, ball chu penalty box pawn chiahah a sawt a, chuta a sawt phei leh chu Southampton goalkeeper Artur Boruc man phak loh chiahin a kal a, goal-ah a lut a, hun a tawp zui a, 1-1 in an inhnehtawk phah a. Ball pet chhuahna atanga a goal na inkar hi meter 91.9 zet a ni.
Premier League title chu la vak lo mahse game 653 zet a khelh tlin theih avangin Gareth Barry hi a ropui ve hrim hrim a. Manchester City chu Premier League title hi a lakpui ve ngei a ni.
2013 khan City chuan Barry hi an chhuah a, mi reng rengin a tlak chhiatna a intan dawn niin an ngai hial a. Amaherawhchu, Everton luhchilhin, bul a tan thar leh a, tlawm mai a tum lo tih a chiang hle.
Eng vangin nge a record hi khum a harsat ang? Tunah chuan player tam zawkte chuan league sang berah kum 20 vel an khel tling ngai tawh meuh lo a. Chu bakah, player te hi Barry anga inhliam ngai mang lo an nih ve te a ngai bawk a, kum 17 vel atanga Premier League khelh chhoh theih te pawh a ngai dawn a ni.
2. Match hmachhawn hnem ber - Arsene Wenger
Sir Alex Ferguson khan record a siam a, Premier League bikah Manchester United inkhel a enkawl hnem hle a, game 810 zet a kaihruai hman a. Kum hlui thlah ni, 2017 khan Arsenal chuan Hawthorns-ah West Bromwich Albion an luhchilh a, Arsene Wenger chuan Arsenal inkhel game 811 a enkawl tling chiah a, Sir Alex-a record a khum chiah a.
Arsene Wenger chuan tun season tawpah Arsenal a chhuahsan dawn a, season tluanin Gunners hi a la enkawl dawn a, season a tawp hunah chuan game 828 a enkawl dawn tihna a ni a, hei hi chu tluk harsa pawl tak a ni tawh dawn a ni.
1. Hattrick siam rang ber - Sadio Mane
May 16, 2015 khan eng thil nge thleng dawn tih tumahin an hre lo. Southampton chuan Aston Villa an sawp rethei hle a, hemi ni hian Aston Villa hi 6-1 ngawtin an chak lo a. Southampton goal chanveah pawh a hmasa pathum te chu Sadio Mane thun niin, record awm lai chu a khum a ni.
Sadio Mane hian minute 2 leh second 56 chhungin goal thum hi a khung a, Premier League-ah chuan hattrick siam rang ber niin, Robbie Fowler-a’n record a lo siam tawh chu a khum a ni.