2016/17 Premier League chu August ni 13 khan kick off a ni ta a, league game khat theuh an khel a, heta tang hian team nihphung tur tam tak a lang thei, hetih lai hian game khat lek erawh tehna atan chuan a la tlak loh a ni.

Manchester United, Chelsea leh Manchester City-ten coach thar an nei a, anni khel hmuh hlan ka nghakhlel hle, ka hmu ta ngei a, Conte game hmuh a nuam ka ti ber.

Barcelona atangin Bayern Munich-ah a kal, team dang leh ram dangah game tactic danglam nen Guardiola chuan Bayern Munich chu league-ah hlawhtlinna a chanpui a, England a pan ta a, hetah hian danglamna a thlen leh dawn em? Tih chu beiseina sang tak nen ka lo thlir a. Manchester City leh Sunderland game ka en kha chuan ka beisei sang lutuk nge? Guardiola-a game khelpui dan tur ni lo tlatin ka hria, Manchester City kha own goal hmangin an chak hram kha a ni a.

Sawi tawh angin game khat chiah a la ni a, tu pawhin season tir game hi chu harsa an ti tlangpui thin. Guardiola hian Man City-ah player tha tak tak a khawm leh mek a, heng player-te hi duhthusamin a la rawn rem leh mai ang tih erawh ka ring tlat a ni. Hetih lai hian Barcelona leh Bayern Munich-a a player thate ang kha chu City-ah hian a nei phak lo maithei, chutah tak chuan Pep-a that leh that loh fiah a ni chho dawn a ni.

Community Shield an khel kan en, Manchester United chuan competitive game tun season-ah vawi hnih an khel tawh, game hnih atangin thil tam tak sawi theih a awm tlat mai. Mourinho-a'n United game mawi tak a la khelhpui lo, Chelsea-ah pawh khan game dak zak khelh a nei tam lem lo, chuvang chuan Man Utd-ah pawh hian game hlimawm tak chu ka beisei em em lo. Hetih lai hian player erawh a nei tha hlawm hle a, tun season Premier League-ah chuan player nei tha ber an ni hial maithei.

Zlatan-a that zia kan hmu nawn awn awn tawh, United midfield buai deuh thin chu Pogba hian a rawn thuam famkim thei ngei dawn niin a lang. Sum tam tak senga player lakhawm an nih avangin Mourinho-a chungah hian Pressure a sang bik emaw tih tur a ni . Mourinho hi game mawi tak aia chak duh mi a nih avangin tun season-ah pawh Champion rinkai ber zingah United an awm kan ti thei awm e.

Liverpool leh Arsenal inkhel kha kan en theuh anga, game hmuhnawm tak a ni a, goal 7 lai luhna game-ah mikhual Liverpool lam an chak ta zawk a nih kha. Arsene Wenger chuan tun season bak Arsenal-ah contract a nei tawh lo, sum a ngah em em laia a hmang hleithei lo hian dem a hlawh phah hle a, an chak loh hlim khan fans tam takin Wenger an au nawmnah a nih kha.

Arsenal hi team tha tak an la ni reng a, season liamta pawh khan pahnihna an ni a, an game hmasa berah inhliam vangin defender tha a chhawr thei lo a, tin a key player-te pawh a chhawr lo hlawm. Team tha tak an la ni tho. Hetih lai hian transfer hun tawite awm tawhah hian Wenger chuan hmatawng leh tlar hnung player tha tak a lei ngei a rinawm a, chung player a lei a nih ngat chuan champion thei dinhmunah Arsenal hi an ding chho ngei ang tih ka ring a ni.

Season laklawh laiin Klopp khan Liverpool a enkawl a nih kha, tun season chu a tir atangin bul a tan ve ta a, Borussia Dortmund a enkawl laia a game ang kha Liverpool-ah kan hmu chho mek, season hmasa kha chuan mawi taka an khelh zawhah nasa takin an tlawm chhunzawm leh mai thin.

Liverpool game-ah consistency a awm lo kan ti thei awm e. Season tharah erawh an game a mawi khawp mai, goal an khung thei a, midfield-ah pawh game an thunun thei tih a chiang. Hetih lai hian Arsenal nena an harsatna chu goal chhuah an awlsam tlat mai, hei erawh an insiam that vat loh chuan point tam tak hloh theihna a ni dawn tlat mai. Arsenal an hmachhawn ang renga an khel thei a nih chuan Liverpool hi tun season champion an ni thei ngei ang.

Thawhtanni zan khan Chelsea chuan 2-1 in West Ham an hneh a, Conte-a'n Chelsea a khelhpui dan a hmuhnawm kher mai. Game khat an khelh tawh atanga enin, team lian zingah Chelsea game mawi ka ti ber a, Willian leh Hazard an khel ropui hle a, a duk hian an duk pur pur a ni ber mai. An defending pawh a khawng tha a, goal khat erawh chhuah mahse goal tha tak leh ven harsa tak a nih avangin Chelsea tlar hnung an demawm lem loh.

Season hmasa hmasa leh champion Chelsea team hi season liamta khan che chhe hle mahse team chhia an ni lo tih a chiang, Mourinho a chhuah hnuah an game-ah team tha an nih zia an lantir leh mai a, mahse an hnufual tawh em avangin an che hleithei ta lo a nih kha. Game khat chiah en chuan Chelsea game tha ka ti ber a, Liverpool kha khel mawiin goal thun nual mahse anni aia Chelsea ka thlanna chhan chu goal 3 lai an chhuah vang kha a ni.

Player khel tha tak tak an awm a, Man Utd-ah chuan Zlatan leh Bailly te an khel tha fal hle a, Chelsea tan Kante, Hazard leh Willian an hmuhnawm. Costa pawhin a form a la hloh love. Coutinho kha chu sawi lohva lum a ni a, Liverpool striker thar Mane a turu dawn hle bawkin ka hria. Season tir chiah a la ni a, game khat chiah an la khel, sawi lawk zuah zuah theih a la ni lo tlat mai, tun season chu season dang zawng aiin coach an tha a, player hming langsar tak tak an chaw lut bawk a, point hloh a uiawm tawh dawn a, an intlansan vang vang thei dawn niin a lang, chuvang chuan season tawpa dingchang ber tur chu squad nei chhah ber an ni ngei ang le.