​Premier League-a Dutch player goal khung thei 6-te

12th October 2016, 01:10AM

Premier League hi foreigner-te avangin a ropui ti ila kan sawi sual lovang. Netherlands hian Premier League-ah player tha tak tak an thawh nual a, Dutch player Premier League-a goal khung hnem 6 kan rawn tarlan turte pawh hi khawvela footballer ropui ber ber zinga hming lang pha an ni nghe nghe a ni.

6. Marc Overmars - 25 goals

Years Active: 1997 - 2000

Club: Arsenal

A debut season-ah goal 12 lai a khung nghal. A debut season-ah hian goal pawimawh tak Old Trafford-ah a khung bawk a ni. He winger hian kum 3 chhung chiah Premier League a khel a, Euro 2000 hnu khan Barcelona chuan £25m in Arsenal atangin an lei ta a ni.


5. Dirk Kuyt - 51 goals

Years Active: 2006 - 2012

Club: Liverpool

Kum 2006 khan Liverpool zawmin, Reds tan mual dinglamah hun a hmang hnem. Heti chung hian Liverpool tan League goal 51 lai a khung thei tlat mai. Liverpool hmelma kumhlun Manchester United lamah hattrick a siam nghe nghe a, kha zet kha chu ngawih bo san mai mai chi a ni lo chiang hle. A taima a, a thawhrim rah a tel leh nge nge thin a ni.


4. Dennis Bergkamp - 87 goals

Years Active: 1995 - 2006

Club: Arsenal

Premier League player ka hmuh tawhah chuan he pa aia thiam tih hi ka la nei lo a ni. Technique-ah a bon em em a, a bu ang thlap hi a ni mai. Arsenal ropuina a ni a, thlawhna a chuan ngam loh avang erawh chuan Champions League match pawimawh khelh loh a nei nual a ni.


3. Ruud van Nistelrooy - 95 goals

Years Active: 2001 - 2006

Club: Manchester United

Khup hliam a tawh hnuah Manchester United boss Sir Alex Ferguson chuan risk a la ngam, Old Trafford-ah a lalut ta a, a tisual lo chiang kher mai. A debut match-ah goal hnih a khung nghal, Goal 20 aia tam season khat chhungin a khung deuh ziah nghe nghe.

Sir Alex-a'n thiam takin Lone striker-ah a hmang a, Nistelrooy-a aia positioning tha leh finishing tha hi Centre Forward dang sawi tur an tam lem lo hle a ni.


2. Jimmy Floyd Hasselbaink - 127 goals

Years Active: 1997 - 1999, 2000 - 2007

Clubs: Leeds United, Chelsea, Middlesbrough, Charlton Athletic

Vawi hnih lai Premier League golden boot winner a ni thei. Leeds United leh Chelsea tan ropui takin a khel a. Chelsea tan Premier League goal 70 lai a khung hem mai. A chak em em a, a finishing a tha bawk nen, striker tawrawt tak a ni.


1. Robin van Persie - 144 goals

Years Active: 2004 - 2015

Clubs: Arsenal, Manchester United

Arsenal captain ni chungin Wenger khan Old Trafford-ah a'n kaltir mai a nih kha. Manchester United-in Van Persie an lei kha chu thil mak tak a ni. Tichuan, Man Utd chu a season khat naah league title a lakpui nghal hmak bawk a. Van Persie-a thawhrah United-in an tel kan ti lo thei lo.

Inhliamin a tlakbuak avangin a form a phak lo chho tial tial a, Arsenal leh United tan Premier League goal 144 khung mahse United chuan Turkey lamah an thehchhuak ta a ni.

Stats Source : Opta

Copyright © inkhel.com 2024. All rights reserved.