Barcelona president Josep Maria Bartomeu chuan Paul Pogba chu a la beisei reng a, Europe khawmualpuia transfer window la inhawn chhung chuan a tan kawngka an hawn thu a sawi.

Josep Maria Bartomeu chuan Manchester United star Paul Pogba chu Camp Nou lama sengluh a duh a, beiseina sang tak nen a la thlir reng a. Transfer window inkhar hma ni 20 la awm chhungin Barcelona chuan Pogba tan kawng an hawn reng tur thu a sawi a ni.

France midfielder Pogba hi Manchester United manager Jose Mourinho nen an inhmu fuh vak lo a, United first team-ah hmun a chang tam lo hle a. Hei vang hian Pogba chuan Old Trafford chhuahsan a hreh loh phah a. Hetianga chhuah a duh thu an hriat hnuah United hian chelh theih dan tur an ngaihtuah ve leh thung tawh a ni.

Premier League game hmasa berah Leicester City nen an inkhelh khan Mourinho chuan Pogba hi captain ban hren a hrentir a, United hi 2-1 in an chak a, Pogba hian goal a thun nghe nghe a. Hetiang hian club chuan hma la mahse Pogba hian chhuah hi a la rilruk reng thei tho a ni.

England-ah chuan August 9 khan transfer window an khar tawh a, Spanish club te chuan August 31 thleng hun an la nei a, hemi chhung hian Barcelona chuan Pogba hi lakluh tumin hma lak an la tum hmel hle.

Pathiannia Supercopa de Espana trophy aan lak hnu khan Pogba chungchang hi an zawt a Bartomeu chuan, “Tu hming mah sawi lan ka duh lo a, club zawng zawngte hi kan zah em em a, ni 20 a la awm tih erawh ka sawi duh,” a ti.

Barcelona hi transfer window hawn tirh atang khan an tul ve hle a, Malcom, Arthur, Clement Lenglet leh Arturo Vidal te an lalut a, Andres Iniesta chuan La Liga champion hi chhuahsanin Japanese club Vissel Kobe a pan thung a. Iniesta chhuah tak avangin a hmun ruak luah tur midfielder tha deuh an melh a, Pogba hi an awt deuh ber a ni.

Barca head coach Ernesto Valverde chuan, “Andres Iniesta ang hi chu kan hmu leh tawh dawn lo a. Iniesta hi pakhat chauh a awm a, tunah chuan Japan ramah a awm daih tawh a ni,” a ti.