Pogba khelh danah Mourinho a lawm

19th April 2018, 03:04PM

Bournemouth-ah Manchester United tan Paul Pogba a inlar a, a khelh danah United boss Mourinho a lawm.

Jose Mourinho chuan nizana 'Man of the Match' Paul Pogba chungchang sawiin "duhthlana tha tak a ni" tiin a sawi.

Tun season-ah Pogba hian beisei angin a khel tha tawk lo a, mitam tak zingah coach Mourinho thlengin sawiselna a tawk.

Harsatna tam tak a tawk chho a, Manchester United atangin a chhuak dawn niin thuthang pawh a tam hman hle. Chutih laiin nizan lamah French midfielder hi a parvul a -  assist vawi 10-na neiin Lukaku tan second half-ah goal a siamsak.

Mourinho chuan, "Man of the Match award hi chu ka tuipui ve vak lo! A chhan chu team manager ka ni, player manager ka ni lo," tiin BT Sport a hrilh.

"He award hi chu ka ngaisang em em lo, amaherawhchu Paul Pogba khelhdanah erawh ka lawm hle a ni. City lakah a khel tha em em a, zaninah pawh a khel tha takzet a ni. Man of the Match-a an thlang pawh hi a awm viau mai," tiin a sawi tel.

Tunkar tawpah Manchester United hian Wembley Stadium-ah FA Cup semi-final khel turin an zin dawn a. Tottenham Hotspur an hmachhawn ang.

" Bournemouth lakah player zawng zawng an khel tha vek a, Tottenham laka khel turin an tling tawk vek a ni," tiin United boss chuan a sawi bawk.

"Players te kha an tha vek a, an mawhphurhna theuh tha takin an ti hlawhtling thei a ni.

"Kan tum hmasak ber chu top 4 a awm ngheh a ni a, tunah chuan point khat chiah kan mamawh tawh ang.

"Game kha a rang a, a nuam hle a ni. Players te kha an position-ah an awm tha a, tuman 'style' an thupui tawh lo. 'Flip' pakhat tal, 'trick' pakhat tal ti an awm lo a, ka lawm hle a ni," tiin a sawi.

Copyright © inkhel.com 2024. All rights reserved.