21 Apr 2017 05:27

Serchhip Chelsea

Player-te vangin tun dinhmun hi kan thleng - Khalid

Aizawl FC head coach Khalid Jamil chuan an hun meka dinhmun țha an luah theih chhan chu a player-te vang a ni tih a sawi a, an thawhhona a țha tih a sawi.

Mizoram Premier League (MPL)-a vawihnih champion tawh Aizawl FC hian I-League season kal mekah pahnihna dinhmun an hauh mek a, pakhatnaa awm mek Mohun Bagan nen point inang nei mahse an inkhelhna hmasa an tlawm vangin Kolkata hian table-ah a chungber an luah.

Aizawl FC hian Inrinni hian Rajiv Gandhi stadium-ah hmahruai mektu Mohun Bagan hi an mikhual dawn a chak ngei ngei an mamawh dawn bawk.

I-League season kal mekah hian khelh hmabak game hnih chiah a awm tawh a Inrinni hian an inhnehtawk anih chuan an game hnuhnung berin engkim a hril thei ang.

An huntawn mek thlirin Khalid Jamil chuan, "Player-te hian season an tan țha kan thawhhona a tha bawk. Kan hun tawn mek hi anmahni vang a ni." tiin a sawi.

Inrinnia inkhel turah hian Mohun Bagan-in hnehna an chan chuan champion nomawi an chawi dawn a, Aizawl FC hian goal hnih chuanga an hneh thung anih chuan an champion ve thei dawn bawk.

An inhnehtawk emaw goal khata Aizawl FC hian hnehna an chan chuan champion tuma inum a nung chhunzawm leh dawn thung a, an game hnuhnung berin engkim a hril ang.

An khelh leh tur thlirin Mumbai FC coach hlui Khalid chuan," "Mohun Bagan hian player țha tak tak an nei a, goalkeeper lah an nei tha. Inkhel hautak a ni dawn a game awlsam a nilo ang."

"Inkhel tinah hian pressure a awm a, țha taka kan zawhfel a țul. Player thlak kual ka tum lo va Mizo player-te pawhin theihtawp an chhuah a team tan engkim an hlan. Rampawn player-te pawh an khel țha țhin khawp mai." tiin a sawi.

AIZAWL FC vs MOHUN BAGAN

A hun: 22nd April, 2017 (2:00pm)

A hmun: Rajiv Gandhi Stadium, Aizawl

Live-na tur: Ten 2