30 Apr 2018 06:38

inkhel

Pele vs Mohun Bagan

Thil kal tawh mah ni se, he inkhel sawi hlawh lo tak hi a tam zawkin kan hre ngai hauh lo ang a. 1977 kuma thil thleng hi kan hriat chian theih nan tarlang thar ang.

‘Football Lalpa’ Pele chuan India ramah football a rawn khel ve ngat tawh a, September 1977 khan Eden Gardens, Kolkata-ah Mohun Bagan nen an inkhel a, chak zawk an awm lo.

India ram chhung football club zingah chuan Mohun Bagan chiah hi hetiang hun ropui tawng thei hi an awm a. Bagan hi New York Cosmos nen an inkhel a, Pele bakah hian khatiang hunlaia player lar rual - Cinnalia, Miffin, Alberto, Roth, Keith Eddie leh Tonyfield te pawh an tel a ni.

Engtia inkhel thei nge an nih?
Dhiren Dey, Mohun Bagan Assistant General Secretary chuan Pele te chu India ram chhunga inkhelhtir ngei a duh tlat mai a. Pele khelhna club Cosmos chu a bia a, mahse club lam chuan Rs. 4 crore zet mai an phut tlat mai a, chutiang zat pawisa sen ngawt chu a ngaihna a awm si lo.

Beidawng duh mai loin Dhiren Dey chuan kawng dang a ngaihtuah ta a. Pele chu a be ta ngawt mai a, India rama an ngaihsan zia leh mi maktaduai chuang zetin a inkhel lai hmuh an chak thu hrilhin, Pele chu club thuneitute be turin a hmin thei hlauh mai a.

Pele chuan Dhiren Dey thusawi chu a ngai thutak hle mai a, Cosmos thuneitute chu a be nghal vat a, a hnuah chuan New York Cosmos chuan an player lar rualte chu Kolkata panpui an remti ve ta a.

September 22, 1977 zan dar 11:15 ah Cosmos football team chuanna Air India thlawhna chu Dum Dum Airport-ah a tum a. Thlawhna tumhmunah chuan a maka maka tam mipui an lo pungkhawm a, ri thei chi hrang hrang nen Pele an lo lawm nasa hle.

An team thlenna tur Grand Hotel an panpui a, chu lamah pawh chuan mipui an lo tlim hmur bawk a. Hetiang taka tamin an lo hmuak chu Pele pawhin mak a tih thu sawiin, lawmawm a ti hle a ni.

Cosmos team in India ram an rawn thlen tuk, September 23 chuan nasa em emin ruah a sur ta tlat mai a. Football ngainatute rilru a hah hle a, Pele inkhel an hmuh theih loh an hlau a. Pele chuan Eden Gardens khelmual diakah a khel duh lo ang ti tawk an lo awm bawk nen, ngaih a ngam thei mawlh tawh lo.

Hetiang teh nuaih karah Pele chu a tawng chhuak ta a, eng ang boruak pawh ni mahse inkhel chu an thulh dawn loh thu sawiin, hei hian football ngainatute chu ngaihthain a awmtir thei ta chauh a ni.

Inkhel chu le:
Hun tiam a thleng ta. Khelmualah mipui 80,000 teh meuh mai an pungkhawm a, Cosmos leh Mohun Bagan inkhel en tumte chuan player te rawn chhuak chu ding chungin an lo lawm a. Thawm ri nuaih nuaih karah ‘Pele Pele Pele’ tih chu a ri dual dual a, chumi karah referee chuan hamrik hamin inkhel a tantir a.

Team pahnihte chu an fimkhur hle a, an innawr danah pawh tihsual hlau tak chungin an che a. Minute 17 chauh an la khel hman tihin mikhual lamin goal an khung ta. Pele chuan Mohun Bagan defence ho karah through ball a pe phei a, hei hi Alberto chuan lain Mohun Bagan goal-ah chuan a thun a, Cosmos chuan 1-0 in hma an hruai a.

An chhunzawm leh deuh chauh a, Mohun Bagan chuan goal thun ve nghalin an si phurh chu an sut nghal zat a. Habib chuan Cosmos player a bum nual a, ball chu Akbar a pe ve leh a. Akbar hian Morais-a diving tackle chu pumpelhin ball chu Shyam Thapa a pe ve leh a. Thapa hian ball chu Cosmos goal-ah a thun a, mipui au thawm a ring tha hle.

Mohun Bagan coach P.K. Banerjee chuan Pele veng turin Goutam Sarkar a ruat a, anni pahnih inveng vel hian sawi a hlawh phah reng a. Minute 23-ah Akbar chuan yard 30 atangin na zetin goal lamah chuan a pet a, ball sawt hian Cosmos goalkeeper Yesin a fuh a, Habib hmaah a va sawt a. Habib chuan ball hi chiang zetin Cosmos goal chhungah a thun a, Mohun Bagan chuan 2-1 in hma an hruai ve thung.

Cosmos chuan goal thun tumin an nawr ve leh ta ngat ngat a, Bagan goalkeeper Sivaji Banerjee a rim tlauh tlauh hle a, a chet that em avangin hma an la hruai chhunzawm theih phah zel a.

Minute 70-naah Sudhir Karmakar chuan Bagan box chhungah Cosmos player a titlu a, referee chuan Cosmos chu penalty a pe a. Cannilia chuan penalty hi petin a hlah lo a, 2-2 in an innhnehtawk theih phah a ni.

An inkhelh tukah Ananda Bazar Patrika chuan Goutam Sarkar chu ‘India ram Beckenbaur’ tiin a hming an phuahsak a. Beckenbaur pawh hi hemi tuma khel tura tih a nih laiin a ke hliam vangin a tel ve thei ta lo a ni.

Inkhelh hnuah:
Mohun Bagan chuan Cosmos player te pualin an thlenna Grand Hotel lamah ruai pui an buatsaih a. Club aiawhin Chuni Goswami chuan Pele chu lunghlu zungbun a pe a. Pele chuan Bagan player te chu a fak hle a, an hun tha neih bawhpelh thin lo se half time-ah 4-1 a a thlengtu lamin hma an hruai theih tur thu a sawi a.

Pele hian a bik takin Goutam Sarkar, Subrata Bhattacharyya, Pradip Chowdhury, Habib, Bidesh Bose leh Shivaji Banerjee te chu a fak hle a. An party zawh fel hnuah Pele hian Goutam Sarkar chu a hnunga ben thek thek pahin, “Nangmah vangin duh angin ka che thei reng reng hleinem,” a va ti ve ngei a ni.

September 25, 1977 ah Pele chuan Calcutta a chhuahsan a, India ramah chanchin duhawm leh sawi hlawh kumkhua tur a hnutchhiah a. Pele hian Cosmos tan a khel zui ta lo a, October ni 1, 1977 ah Cosmos tana a match hnuhnung ber a khel a ni.