16 Apr 2018 08:36

inkhel

Pawisa hman chiam kan tum lo: Jose Mourinho

Manchester United manager Jose Mourinho chuan season tharah an hmelma Manchester City tluk phak tum vangin pawisa hman vak vak a tum loh thu a sawi.

Mourinho chuan tun aia nasa zawka Manchester United a chawi san theih nan uchuak taka sum hman chu tul a tih loh thu sawiin, player thar a lalut dawn a nih pawhin sum ren deuha a chet tur thu a sawi a ni.

Jose Mourinho hian 2016 khan Old Trafford hi a luhchilh a, United a enkawl hnuah player leina atana pawisa a hman hi £300 million chuang a ni tawh a, kuminah chuan hetianga pawisa hman vak vak hi a tih tawh loh tur thu a sawi a ni.

“Kan theih bak aia tam chu pawisa kan hmang dawn lo a, engmah hi kan uar chiam chiam dawn lo a. Tlema insiamthat chu kan tum ngei dawn a, chu zawng chu a ni mai a. Midang pawhin insiamthat an tum vek a, season hmasaah parukna kan ni a, tun season-ah chuan pahnihna kan nih hmel hle,” a ti a.

“Season tharah chuan tun aia hma kan sawn lehzual ka beisei a, eng nge lo thleng dawn tih chu a hunin a la hril mai ang a. City pawh hian tun aia tha lehzual turin pawisa tam tak an hmang ral mai thei a, midangin an hnaih theih lohna turin hma an la thei a, engmah a sawi theih loh,” a ti bawk.

A sawi zelnaah, “Keini leh anni chauh a ni bik lo a, keini te, anni te, Liverpool te, Arsenal te, Chelsea te leh Spurs te pawh an tel vek a, City leh United chauh an ni lo a, venthawn tur kan ngah a ni,” a ti bawk a ni.

Portuguese pachal hnuaiah Paul Pogba leh Romelu Lukaku te lalut mahse Premier League title erawh an la thei ta chuang lo a. Nikum chhung khan Victor Lindelof (Benfica - £39.5 million), Romelu Lukaku (Everton - £90 million), Nemanja Matic (Chelsea - £40 million) leh Zlatan Ibrahimovic (Free transfer) te an lalut a. 2013 a Sir Alex Ferguson a chawlh hnuah khan Manchester United hian Premier League title hi an la leh thei ta rih lo a ni.