Pakhatna ni chunga champion duh Hamilton

27th October 2017, 04:10PM

Formula One season kal meka hmahruai mektu Lewis Hamilton chuan dawhsana lawn ngei chungin champion a duh tih a sawi.

Mercedes driver hian champion turin a chhe berah pangana nih chiah a mamawh tawh a, amah hnaih bertu Sebastian Vettel nen an inthlauhna point 66 lai a ni tawh.

Mexican Grand Prix tlan leh tur awmah Ferrari driver Vettel hian pakhatna dinhmun pawh hauh se Hamilton hian pangana china intlansiak a zawh chuan World Champion a ni thei dawn.

Kum 32 mi Hamilton chuan, "Intlansiak tinah hian ka theihna lantir zel ka duh. Panganaa thlen hi ka tum lo va, midang dawhsana an lawnlaia champion nih pawh ka tum lo. Ka duhthusam chu dawhsana lawn chungin champion a ni." tiin a sawi.

August thlaa Belgian Grand Prix an tlan thleng kha chuan Vettel-a'n hma a hruai a, mahse Asia-a an tlanna pathumah harsatna tawkin vawihnih a tlan tluan thei lo va vawikhat palina a ni bawk.

British driver Hamilton hian intlansiak an neih hnuhnung paruk avangin pakhatna dinhmun vawinga a hauh thei a, pakhatna a nih loh țum pawhin pahnihna a ni thei.

Mexican Grand Prix-ah Hamilton hian pangna hauh pha lovin a ai sang pawh hauh pha lo ta se chuan Vettel hian champion beiseina ala nei zui zel thei a, mahse a hautak dawn.

Hamilton hi lo che fuh lo ta pawh ni se Vettel hian Mexican Grand Prix-ah pakhatna emaw pahnihna dinhmun a hauh ngei ngei loh chuan champion beiseina a nei thei dawn lo va, Mexican Grand Prix bakah hian Brazilian Grand Prix chiah tlan tur an nei tawh a ni.

Copyright © inkhel.com 2024. All rights reserved.