Pacquiao vs Khan kan hmu dawn

27th February 2017, 05:02AM

Boxing khawvelin alo suangtuah țhin zinga pakhat chu April ni 23 hian a takin a thleng dawn a, WBO world welterweight-a champion lai Manny Pacquiao leh Amir Khan-te an inhnek dawn.

Pacquiao hian Twitter-ah a fan-te'n a hmachhawn leh tura an duh vote hmangin a thlan tir a, Great Britian boxer Amir Khan hian vote a hmu sang ber.

Kum 38 mi Pacquiao hian Khan nen an inhnek tur hi 'Fan-te duhthlan a ni.' tiin Twitter-ah hian a tarlang.

Kum 30 mi Khan pawh hian Pacquiao nen an inhnek dawn tih hi a tarlang ve thuai a, an inhnekna hmun tur hi Pacquiao chuan United Arab Emirates tiin sawi mahse a hmun tur tak ala hriatloh.

Khan hian UK, Dubai leh United States-ahte hmun remchang an melh mek tih a sawi a, ni reilote hnuah an ti chiang ang.

2004 Olympics (boxing lightweight)-a Silver medal dawngtu Khan hian Kell Brook, Jeff Horn leh Terence Crawford-te khumin Pacquiao-a'n vote thlakna tur a siamah hian 48% lai vote a hui a he chona hi tlansan lovin a pawm.

Khan hian nikum May thlaa Mexican boxer Saul 'Canelo' Alvarez a hnehloh hnu khan tumah a hmachhawn leh tawh lo va, a hmachhawn leh tur Pacquiao pawh hian nikum November thlaa Jessie Vargas a hneh hnu khan tumah a hmachhawn leh tawh bik lo a ni.

* Pic: Getty

Copyright © inkhel.com 2024. All rights reserved.