Manny Pacquiao chuan WBA lightweight champion Vasyl Lomachenko nen inhmachhawn a chak thu a sawi a, chutiang hun a awm thei dawn a nih chuan a inpeih thu a sawi.

Inrinni khan Ukrainian boxer Vasyl hian Jorge Linares chu a knock-out a, weight category pathumah champion a ni a, khawvela boxer tha berte zingah a hming an sawi ri chho ve reng tawh dawn a ni.

Madison Square Garden-a inhnekah Lomachenko hian round 10-naah a khingpui Linares chu a knock out a, Pacquaio chuan Vasyl Lomachenko a hmachhawn theihna tur a nih chuan welterweight atangin lightweight a tlak thlak a inpeih thu a sawi.

Weight category 8 zeta world champion ni thei Pacman hi July 15 khian WBA king Lucas Matthysse nen 147-pound division-ah an inhmachhawn dawn a, hemi hnu lamah hian Lomachenko hmachhawn theih dan awm se tiin a duhthu a sam a ni.

Pacquiao chuan, “Vasyl Lomachenko chuan Jorge Linares a hneh a, tunah chuan lightweight belt a kawl ta a. Dik taka sawi chuan Vasyl nena inhmachhawn theih chungchang chu ka ngaihven khawp mai,” a ti a.

“Eng vangin nge America ramah kan inbeih leh loh ang? Engtik lai pawhin fighter ka ni a, inbeihpui tur tha tak an awm a nih phawt chuan khawi hmunah pawh ka hmachhawn thei reng a. Anmahni lamin min chhang duh a nih phawt chuan keini lam chu kan inpeih reng e,” a ti bawk.

Filipino star Pacman hian 2008 khan round 9-naah David Diaz chu hnehin WBC lightweight title a kawl a, vawi hnih ngawt Olympic gold medal lo dawng tawh Lomachenko nen an inhnek a nih chuan a tan chuan a khirh ve viaua a rin thu a sawi.