13 Sep 2017 01:38

Inkhel

Mizo Sports Website hmasa ber

​Ozil-a dinhmun a chiang lo

Nakkum nipuia Arsenal-a contract zo tawh mai tur Mesut Ozil chuan contract a ziak chhunzawm dawn nge dawn lo a la hriat loh.

Season liamta tawp lamah khan Arsenal hotute chuan Sanchez leh Ozil te kha contract thar ziahpui an tum a, nasa takin indawr mahse Wenger-a dinhmun a chian loh avang khan heng player pahnihte hian contract thar an ziak duh lo kha a ni a.

Tun hnaia thu thar ber chu Arsenal hian Ozil hi nakkum February thla hma chu contract chungchang an sawipui rih dawn lo a ni tih Sport Bild chuan a tarlang.

Champions League an khel phak lo, tun season an khelh that dan azirin Ozil hian Arsenal-ah contract thar a ziakin a ziak lo thei niin Sport Bild chuan a tarlang. Arsene Wenger hian Ozil a chelh zel a, hetih lai hian Wenger-a dinhmun pawh a chiang bik lo, tun season tira an chet that loh chuan ani pawh ban tawk thei reng a ni.

Wenger ban a nih chuan Ozil pawh hian Arsenal a chhuahsan duh ngei dawn nia sawi a ni chhunzawm bawk. Germany international kum 28 mi Ozil-a thiamna hi chu hmuhhmaih theih a ni lo, hei vang hian Arsenal a chhuahsan a nih pawhin club lian a zawm ngei a rinawm tlat a ni.