Olympic-a Russia medal lak hlihsak leh an ni

01st December 2017, 04:12AM

Russia athlete pahnih chu 2012 London Olympics-a damdawi hman phalloh an hman avangin International Olympic Committee (IOC) chuan an hrem a, an medal lak an hlihsak bawk.

IOC hian Russian athlete-te an endik tawhna hnu an ennawn leh a thil tisual hi an hriatbelh.

Women's 4x400m relay-a silver medal dawng zing ami Yulia Gushchina chuan damdawi hman phalloh a hmang tih an hrechhuak a, hei vang hian Women's 4x400m relay-a an medal lak zawng zawng hlihsak an ni.

Women's long jump-a pangna hauhtu Anna Nazarova pawh hriatchhuah niin IOC hian an hrem.

Kum 2016 December thlaa tihchhuah McLaren report-in an tarlan danin kum 2011 leh 2015 inkar khan Russian athlete tam tak chuan state-sponsored doping programme hmang țangkaiin hlawkna an nei tih puanchhuah a ni a, infiammi 226 an endik hnuah mi 21 chu hrem tawh an ni.

IOC chuan Russia-in an thlen 2014 Winter Olympics-ah pawh khan thil dik lo ti an awm ngeiin niin an ngai a, hei pawh hi an chhui mek.

Kumin November ni khat hnuah pawh Russian athlete 19 lai chu damchhung atan hrem an ni tawh a, South Korea-in a thlen tur 2018 Winter Olympics-ah pawh Russia hi an tel thei lo maithei a December ni 5 hian hemi chungchang hi tihfel a ni ang.

Copyright © inkhel.com 2024. All rights reserved.