Olympics champion leh world number one a hneh tum aiin inhnek thunun tha zawkah inngai mah se NT Lalbiakkima'n Kazakhstan boxer Ezahn a hneh lo va, Jun ni 9, Inrini khan Astana khawpuiah President's Cup semifinal paltlang zo lovin a tla.
India aiawha feh chhuak Mizo boxer Biakkima'n a pan tluan a, a hnaih rualin a vei leh ding rang takin a chhuah. khawtual boxer Ezahn chuan tawlh pahin a ban seina hmangin a ban phak atangin a hnek ve thung.
Judge pathumte Kazakh vek an ni a, round tinah Ezahn pe tam vekin 30-27, 30-27, 30-27 in an dah chungnung a, unanimous decision-in Biakkima lakah a chak a, final a lut.
Zirtawpni khan Biakkima hian quarterfinal-ah 2016 Olympics champion leh amatuer lightflyweight world number one Uzbekistan boxer Hasanboy Dusmatov nawr hnehin a chak tawh. Ezahn-a hmaah inkhel a thunun zawk nia a inhriat laiin chiang takin a tlawm.
Thahrui leh tharum nei tha zawk a nihzia chiang takin Siaha tlangvalin a lantir a, nuam ti takin a tawp thlengin a khel tluan. Ezahn a chau zawk chiang viau a, round thumna tawp lamah awmze nei tamin a hnek let tam lo va, vawi nga a tlu.
2014 atanga kum li LPS Pro Fight lightflyweight champion ni zawn mek Biakkima'n bronze medal hnek chhuak mah se a chak loh danah lungawi har a ti a, judge pathumin round zawng zawnga khawtual mi an chaktir vek chu pawm harsa a ti hle.
Engti zawng pawhin round thumnaah Biakkima a chungnung zawka ngaih theih a ni a. An inhnek zawh rualin India coach Jaisingh Patil chuan chak ngei inringin ban a phar a, Ezahn aiin Biakkima'n chak a inring zawk tih an chet dan atangin a lang bawk.
Biakkima chuan : "Judge-ah Kazakh mi pathum an thuttir a, round tinah ka chak lo vek. Mipui, a hmuna kan inhnek entu Kazakh hovin i chak zawk mi ti vek bawk si a, mak tak a ni.
"Nimin (Dusmatov nen an inhnek tum) aiin ka hnek chiang tam zawk a, kan coach-te pawhin round tin a zawh rualin ka la an ti zel a, kan la vek e, an ti. Entu zawng zawngin 'you win' min ti vek a, hriatthiam a har khawp mai," a ti.
Biakkima hian hetiang hi a tawng tawh a, Haryana-in national championship an thlen tumin Haryana boxer nen final an khel. Nung leh mar takin a nawr tluan a, rang taka a che vel leh ngam taka a beih dan avangin a hmuna Haryana mipui zawng zawng mit a tlung a, mahse, khawtual mi hneh lovin a tlawm tawh a ni.
A beisei thleng pha lovin rilru na takin Biakkima tla mah se Mizoram leh India boxing tan hriatreng tur hnuhma a hnutchhiah. Khawvel inelna sanga lang turin theihna a nei tih a lantir a, a khelhpui zawng zawngin thahrui leh tharumah an khan lo em em vek.
Round 1
Biakkima'n inveng takin a pan nghal a, thiam takin Ezahn a tawlh kual a, rang takin a lo hnek a, a rawlh fuh fo. Biakkima'n a nangching tam lo va, a hnaihchilh rualin a vei rang takin a vai a, Ezahn chuan rang tak bawkin a hnek zawn fo mai. A tawp dawnah an invai tawn a, Biakkima'n nghing lawihin a hnek fuh a, round pumpui erawh a thunun zo lo va, a hnek chhuak tam lo. Ezahn chuan a tawlh pahin awmze nei takin a hnek lut dik a, a hnek chhuak deuh reng bawk.
Ezahn 10-9 Biakkima
Round 2
Ezahn chuan a ban seina awmze nei zawka chhawr tumin a tawlh kual nasa a, Biakkima'n panin luh mai harsa a ti hman viau na a, rei lo te hnuah hma a sawn. Hnaihchilhah Biakkima a rang a, a vai zawn hmangin lehlam tan harsatna a siamsak. Biakkima'n rang leh thui takin a ding chhuah thut thin a, bawhzui nghalin lehlam a tibuai. Ezahn chuan a ban phak atangin a vei leh ding a chhuah thut thut thin bawk a, a tangkai viau. A tawp dawnah Biakkima'n a vei leh dingin chiang takin a vai fuh zawn a, inpawmchilhah a dingin a dawm fuh leh a, Ezahn chuan hnek let tho mah se a bet zawkah a tang.
Biakkima 10-9 Ezahn
Round 3
Biakkima a pan nghal a, vei leh ding chhuah zawnin a hnek fuh a, Ezahn chuan a vei a rawlh lut ve thung. Biakkima'n a vei lam rang taka a chhuah hnuah Ezahn-a veiin a rawn chhunzawm ve zat zel. Biakkiama vei ding zawnin a tum a fuh laiin Ezahn-an a vei ngilin a chhang let. Round laihawlah Ezahn a che tha hman viau na a, a tawp lamah hneh takin Biakkima'n a nawr a, vawi nga Ezahn a tlu a, kuttum a tawrh vang ni lo mah se a chau zawk tih a lang chiang hle. Biakkima'n hual chepin a hnek zawn a, Ezahn chuan awmze neia chhan let theih loh lai a nei a, a tla fual nasa. Biakkima'n nuam a ti tulh tulh a, a nawr luatah tum hnih khat dawn zauh nei ve mah se round tawp lam a awpbet chiang hle.
Biakkima 10-9 Ezahn
Result : Biakkima 29-28 Ezahn
(adsbygoogle = window.adsbygoogle || []).push({});