Nomawi chawi tur chuan hun kan la mamawh - Pochettino

23rd February 2017, 03:02AM

Champion team din tur chuan hun a duh rei a, a hmanhmawh vut vut theihloh bakah dawhtheihna a ngaih thu Tottenham Boss Pochettino chuan a sawi.

Tunhnai kum hnih thum chhungin Tottenham Hotspur hian hma an sawn hle a, Premier League-ah phei chuan club tha berte zinga mi an ni tawh. Chutihrualin Europe inelnaah erawh an chetha hleithei bik lova, Champions League an khelhah Europe ramdang club-te an ngam thei meuh lo.

Tunah Europa League-ah last 32 second leg khelh an la hmabak a, Belgium club Gent khelmualah 1-0 in an tlawm tawh a, February 24 khian White Hart Lane-ah AA Gent hi an mikhual ve thung ang. Tottenham hian last 16 kai turin an home-ah an chak ngei ngei a ngai a, goal an chhuah thianglo bawk.

Thuthar lakhawmtute hmaah Pochettino chuan, "Hun hi duh duh a thunun theih a ni lova, hei hi kan hriatreng atan pawimawh a ni. Champion kan duh a, kan club hi dinhmun sang takah dah kan duh ti a han sawi mai hi chu thil awlsam tak a ni.

"Stadium thar nei turin hun kan mamawh ang hian nomawi tam tak chawi thei tur khawp a team tha din tur pawhin hun kan mamawh a ni. Tunah hian team tha tak kan din mek a, kawng dik kan zawh mek niin ka hria.

"Hun reilote chhunga team ropui tak din chu thil theihloh tlik a ni a, duhtawk a sum hman tur i nei a nih ngawt loh chuan a harsa viau ang. Khawvela player tha ber ber lei turin sum nei ila chuan reilote chhungin khawvela team tha ber kan din thei ang chu.

"Tuna team kan din mek erawh hi chu sum tam tak senga leikhawm an ni ve lova, nasa taka rilru leh ngaihtuahna kan sen atangte, kan thawhrimna avangte a ni. Hna tha tak kan thawk mek niin ka hria a, tunah chuan chak duhna rilru ka put a hun tawh a, chumi tur chuan kan inzirtir mek a ni. Ka sawi tel duh chu inkhel pahnih khat lek a chak chu a harsa lo, nimahsela nomawi sual chhuah erawh a harsa hle. Kan tum hmasak ber tur chu Premier League a ni, "tiin a sawi.

Stadium thar sa mek anga in tehkhinin Pochettino chuan, "Tunah hian Stadium thar sa mek ang kan ni a, a tam zawk chu kum hnih kalta khan kan zo tawh. Kan training ground leh a chhehvel pawh a ropui hle mai a, khawvelah a tha ber pawl a ni.

"Kan tihtur leh zawh tur ang chu kan zo thuak tawh a, kum khat bak a rei berah kan mamawh tawh lovang. Reilote min han nghak leh hlek ula, hun kan la mamawh deuh a ni tih hi in hriatthiam ka beisei.

"Tun atanga reiloteah chuan kan nomawi hunna pawh nalh takin kan siam zo ang a, trophy lawmin kan la au dual dual dawn nia. Totteham hi hlawhtlinna lian tham tak chanpui ka duh a, ka tan he chona hi a phurawm hle a ni, "tiin Tottenham chu khawvela team tha ber berte zinga mi ni turin hun a duhrei tawhloh tur thu a sawi a, tehkhin thu a sawi thiam hle.

Tottenham Hotspur hian 2008 khan major trophy an la a, kha kha an club chanchina nomawi an chawi hnuhnung ber a ni.

Copyright © inkhel.com 2024. All rights reserved.