​Nizan inkhel.com admin chanchin (Liverpool vs Dortmund)

15th April 2016, 05:04PM

Zan rei inkhel vil tur hian admin pahnih khat hi kan inruat thin a, mahni club tante an inkhelh dawn erawh chuan kan invil tir ngai lo. Tin, zan dar 12 hnua inkhel hi chu, inkhelh zawha match report pek nghal bawk chuan zing dar 4 velah kan mu hman tawk thin.

Hengte a nih avang hian inkhelh laiin live score kan neih bakah match report hi kan ziak nghal mawlh mawlh thin a, inkhelh zawh atanga darkar chanve chhunga mut ve hman ngei tumin report pek vat vat tumin kan tang thin. 80 mins vela 3-0 laia hma an hruai hi chuan chak tur a chian tawh avangin match report kan zo hma em em thin bawk.

Nizan Europa League quarter final 2nd leg Liverpool vs Dortmund erawh kan ziak sa vawi engemaw zat kan thaichhe leh a, hun tawp dawn tak takah kan ziak tha leh ta zawk a. First half-ah si hnih faiin Dortmund khan hma an hruai a. Aggregate chuan 3-1 a ni a, Liverpool tan comeback a harsat tawh dawn avangin half time a nih kha chuan match report introduction leh conclusion-ah Dortmund chak tur angin kan ziak vek tawh.

Mahse second half tan tirah Origi chuan goal a khung a, 2-1 a ni a, Liverpool tan chak turin goal hnih khung a la ngai, hetah hian comeback theihna chance a awm avangin kan thu ziak lawk kan thai chhe phawt. Chutih laiin Reus chuan Dortmund tan goal a khung leh si a. 3-1 laiin Dortmund chuan hma an hruai tawh. Liverpool tan goal thum khung a la ngaih avangin comeback na chance a chhiat tawh em avangin Dortmund chak tur zawk angin match report kan peih leh diam a.

Liverpool khan Countinho leh Sakho hmangin goal an khung ve leh, 3-3 a ni a, hun a tawp tawh dawn, Liverpool tan comeback na chance la awm mahse away goal rule hmanga Dortmund an chak theih dawn avang khan away goal rule hmanga Dortmund chak zawk tur angin kan ziak lawk leh a. Mahse 90+1 mins-ah Lovren chuan a ti goal leh ta si. 4-3 in hma an hruai ta.

Kan ziak sa kan thai chhe leh a, Liverpool chak zawk turin hmanhmawh takin kan ziak leh chung chung a, hetih lai hian Dortmund khan penalty area pawn hret atang khan free kick an hlawhchhuak a. A goal hlauh chuan ziah that leh a ngai dawn, tan lam nei lo admin chuan a goal palh hlau em emin thin phu dep depin a en a, Ilkay Gündogan free kick pet chu a goal ta lo hlauh mai. Liverpool an chak a ni tih tarlan a ni chhunzawm ta a ni.

He thu kan rawn tarlan nachhan hi chu.. Nizan match kha a pui thlawt a, match report kan ziak dan pawh vawi engemaw zat kan siam rem a. Inkhel hmuhnawm tak a ni a, Dortmund leh Liverpool fans an han zai rual dual dualte phei kha chuan football ropui zia an lan tir a. Boca juniors fans neih that zia kan hria, Europe-ah erawh Liverpool leh Dortmund te aia fans nei tha sawi tur an awm bik chuang lo. Nizan inkhelte ngat phei kha chu a tir atanga a tawp thlengin zai kan ngaithla a, pawna an chhuah hnu thlengin an la zai ho bawk nen.

Football history-ah chuan nizan match kha hriatreng a ni tawh ang. Keini pawhin kan buaipui dan kha kan hre reng tawh bawk ang a, inkhel member football ngaina tak tak, mahni club-te inkhelh loh tum pawha football en tam tak in awm a, news update apianga comment in rawn pek zat zat hi chuan kan mut a chhuak ngai lo a nia, Pathian awmpuina leh nangni avang chauh hian ngelnghet takin kan la kal thei a, Pathian hnenah leh in chungah lawmthu kan sawi a ni. 

Copyright © inkhel.com 2024. All rights reserved.