Confederations Cup 2017 Group A te chuan Group mach an khel zo ta a, Portugal leh Mexico te chuan an match hnuhnung berah an khingpui ve ve hnehin semi final an lut ta a ni.
Portugal chuan 4-0 laiin New Zealand an sawp a, Mexico chuan 2-1 in a thlengtu Russia an hneh. Point 7 ve ve neiin goal difference-ah Portugal an chungnun zawk avangin Group winner an ni a, Group B pahnihna nen semi final an khel dawn a ni. Russia chuan point 3 an nei a, New Zealand chuan point an hlawhchhuak ve lo a ni.
New Zealand 0 - 4 Portugal
(Ronaldo 33'pen, Silva 37', Andre Silva 80', Nani 90')
PLAYER RATINGS (data source : opta)
Portugal: Patricio 6, Eliseu 6, Alves 6, Pepe 5, Semedo 7, Moutinho 6, Danilo 6, A Silva 7, B Silva 7, Quaresma 6, Ronaldo 7. Subs: Pizzi 6, Nani 7, Martins 6.
New Zealand: Marinovic 6, Ingham 5, Durante 5, Boxall 6, Doyle 6, McGlinchey 5, Thomas 5, Smith 6, Lewis 5, Rojas 5, Wood 6. Subs: Tuiloma 6, Barbarouses 6, Smeltz 6.
Ronaldo chuan 1st half 33 mins-ah goal hmahruai penalty atangin a khung a. Danilo chu New Zealand defender pahnihin box chhungah an titlu, referee chuan penalty a ham a, he penalty hi Ronaldo chuan goal-ah a chantir.
Ronaldo hian Portugal tan goal 75 a khung tling ta a, competitive international goals 60 a khung tling ta bawk a. Europe player zingah ani aia goal khung hnem an awm lo.
Goal hnihna hi 37 mins-a lut a ni a, Silva chuan Eliseu cross chu box chhung atangin a tlawh goal. Second half 80 mins-ah AC Milan striker thar Andre Silva chuan solo goal mawi takin a khung a, hun tawp dawn tak takah bench atanga lut Nani chuan goal lina khungin 4-0 in hnehna an chang ta a ni.
Ronaldo hi inkhelh tluan tir a ni lova, goal khat aia tam khungna chance a nei a, first half-a a tauh tha zet chuan New Zealand goal bar a per dawp nghe nghe. Ronaldo hi Portugal tana a game hnuhnung 9-ah goal 14 a khung a, assist vawi 2 a nei ta.
Pictures credit : Reuters