​NBA game khata point 70 score tling thei naupang ber Booker

25th March 2017, 09:03PM

Phoenix Suns shooting guard Devin Booker chuan Boston Celtics an hneh loh(130-120) tumin point 70 tehmeuh a score a, NBA chanchina point 70 score tling thei naupang ber a ni. Booker hi kum 20 leh ni 145 leka upa nimahse Basketball legend: Wilt Chamberlain, Kobe Bryant, David Robinson, Elgin Baylor leh David Thompson-te huangah ziahlan a ni tawh ang.

Booker vs Celtics: PTS-70, REB-8, AST-6, STL-3, FG: 21-40, 3PT: 4-11, FT: 24-26, MIN- 45

Booker hi NBA team ropui ber pawl Celtics laka point score hnem ber a ni nghal a, season kal mekah Celtics hi NBA team zinga defensive tha ber 11 an ni mek nghe nghe. Booker chuan, "Hetiang thil hi chu defensive team tha Celtics-te lakah chuan a thleng zen zen ngai lo. Ka awmdan kha sawifiah theih pawh a ni lo a, tunhma pawhin dawng viau thin mah ila tun ang em em hi chu a ni ngai lo," tiin point 70 a score-na Celtics chu sawinep mai loin team tha an nih thu a sawi.

Booker hian first half-ah point 19 a nei tawh a, second half third quarter bikah point 23 zet score lehin last quarter-ah point 28 a score leh bawk. Booker record siamna kawngah Suns coach Earl Watson leh a teammate-te an pawimawh a, Booker-a'n point a score theihna turin vawi tam an foul luih bakah a tan liau liau time-out an call fo a ni. Suns hian play-offs an khel thei tawh lo chiangsa a, Booker hi season tharah chuan NBA team lian zawkin lakluh(trade) an tum ngeiin a rinawm.

TAWI NAWI:

* Booker hi Suns player zinga game khata point 40 score tling thei naupang ber a ni.

* Brandon Jennings khan kum 2009 khan kum 20 mi niin Golden State Warriors lakah point 55 a score a, Booker hi Jennings hnua kum 20 mi point 50 score tling leh thei hmasa ber a ni.

* Kum 1983 hnu khan player pathum chiahin kum 21 an tlin hmain point 50 an score tling thei a: Lebron James leh Brendan Jennings-te hnung zuiin Devin Booker hi a pathumna chiah a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.