Thawhtan zan khan Santa Monica, California-a Barker Hangar-ah National Basketball Association (NBA) chawimawina sang an sem a, NBA Awards 2018 semnaah hian Dwane Casey chu Coach of the Year atan an thlang.
Detroit Pistons head coach atana an ruat Casey hian Toronto Raptors chu regular season-a an tawn san ber a thlenpui a. Playoff-ah Cleveland Cavaliers an hneh lo a, hemi hnu hian season liamtaa vawi 59 chakpuitu, Raptors record siampuitu hi Toronto chuan an ban zui a. Hetiang hi a dinhmun ni mahse NBA coach tha berah hian an thlang ta tho a ni.
He chawimawina dawng thei tur hian Dwane Casey bakah Boston Celtics coach Brad Stevens leh Utah Jazz coach Quin Snyder te chu an nominate a ni.
Casey chuan, “Ban nih chinah chuan ngaih a tha thei tawh lo a, awm a nuam lo a, thil ropui tak beisei a harsa tawh khawp a. Chutih laiin hetiang chawimawina ropui tak min hlan hi mak ka ti zawk a, lawmawm hi ka ti hle a ni,” a ti.
Thla hmasa khan Casey hian chawimawina a lo dawng tawh bawk a, Michael H. Goldberg NBCA Coach of the Year Award hlan a ni a. He chawimawina hi kum tin an sem thin a, league coach 30 te zinga tha ber hnenah an hlan thin.
NBA Award sem zan hian chawimawina dang pawh an sem nual a. Utah Jazz star Rudy Gobert chu Defensive Player of the Year atan an thlang a. Jazz center hian New Orleans star Anthony Davis leh Philadelphia star Joel Embiid te a khum a ni.
LA Clippers guard Lou Williams chu Sixth Man of the Year chawimawina an hlan a. Lou Williams hi Houston player, nikum lama he chawimawina lo dawng tawh Eric Gordon leh Toronto star Fred VanVleet te chuan an tluk ta lo.
Indiana Pacers guard Victor Oladipo chu Most Improved Player atan an thlang bawk a. Oladipo hian Pacers-a season khat a khelhnaah average 23.1 a nei a, All-Star rual zingah hmun a chang pha a, Houston player Clint Capela leh Brooklyn Nets star Spencer Dinwiddie te khumin he chawimawina hi a dawng.
Hall of Famer Oscar Robertson hnenah Lifetime Achievement Award an hlan a. Robertson hi Charles Barkley leh Kareem Abdul-Jabbar te chuan he award hi an hlan a ni.
Award hrang hrang dawngtute
NBA Most Valuable Player : James Harden, Houston Rockets
NBA Rookie of the Year : Ben Simmons, Philadelphia 76ers
NBA Sixth Man Award : Lou Williams, LA Clippers
NBA Defensive Player of the Year : Rudy Gobert, Utah Jazz
NBA Most Improved Player : Victor Oladipo, Indiana Pacers
NBA Sportsmanship Award : Kemba Walker, Charlotte Hornets
NBA Coach of the Year : Dwane Casey, Toronto Raptors
Sager Strong Award : Dikembe Mutombo
Lifetime Achievement Award : Oscar Robertson
Play of the Year : Clutch Shot of the Year - LeBron James, Cleveland Cavaliers
Clutch Shot of the Year : LeBron James, Cleveland Cavaliers
Dunk of the Year : Giannis Antetokounmpo, Milwaukee Bucks
Block of the Year : Anthony Davis, New Orleans Pelicans
Assist of the Year : LeBron James, Cleveland Cavaliers
Hustle Award : Amir Johnson
Handler of the Year : Kyrie Irving, Boston Celtics
Best Style : Russell Westbrook, Oklahoma City