Rafael Nadal chuan Dominic Thiem hnehin a vawi 11-na atan French Open title a la a, record thar a siam.
French Open final-ah hian Spanish star Rafael Nadal chuan Austrian Dominic Thiem chu 6-4, 6-3, 6-2 in a hneh a, French Open title la hnem ber a nihna chu a belhchhah zel a, Roland Garros-ah hian vawi 11 a champion ta chiah a ni.
Kum 32-a upa Nadal hian Grand Slam title 17 a la tling ta chiah a, Roger Federer chiah tluk loh a la nei a, Federer chuan vawi 20 a la tling tawh a. Tun season-ah Grand Slam title vawi hnih a lakna niin, Nadal hi World No. 1 a la ni zel dawn a ni.
7th seed, kum 24-a upa Thiem hi major final a luh vawi khatna a ni a, Nadal hmaah chuan duh angin a che thei meuh lo a ni ber a. An inkhelh zawhah Nadal chuan, “Hun rei vak loah chuan helai hmunah hian Thiem hi a la champion ngei ka ring,” tiin a sawi.
11: Nadal chu tuna la inkhel mek, mipa leh hmeichhe zingah Grand Slam tournament title pangngai vawi 11 la thei awm chhun a ni a. Real Madrid in European Cup vawi 11 an lak an sawina angin La Undécima an ti ve a ni. Tennis khawvel hrim hrimah chuan Nadal hi title ngai vawi 11 la thei pahnihna niin, Australian star Margaret Court chuan Australian Open title vawi 11 a lo la tawh a ni.
Title pangngai la hnem dangte chu Martina Navratilova (9, Wimbledon), Roger Federer (8, Wimbledon), Serena Williams (7, Australian Open & Wimbledon), Steffi Graf & Pete Sampras (7, Wimbledon ve ve), Roger Federer & Novak Djokovic (6, Australian Open ve ve), Steffi Graf & Bjorn Borg (6, French Open ve ve) leh Serena (6, US Open) te an ni.
1: Rafael Nadal hi Open Era-ah chuan tournament hrang hrang pathuma title 11 la thei hmasa ber a ni a, Monte Carlo leh Barcelona-ah te La Undécima hi a lo puitlin tawh bawk a ni.
4: Open Era-ah kum 30 tlin hnua Grand Slam title pathum emaw, a aia tam emaw la thei palina a ni a. Rod Laver, Ken Rosewall leh Roger Federer te chuan vawi 4 theuh an lo la tawh a ni.
17: Nadal-a’n Grand Slam title a kawl zat niin, Open Era-a mipa zingah chuan pahnihna a ni a, Roger Federer (20) chiah a aia chungnung a awm tawh a, Pete Sampras (14), Novak Djokovic (12) leh Roy Emerson (12) te chu a lehpel tawh a ni.
57: Clay court-a Nadal-a’n title a lak zat a ni a, Vilas (49) leh Thomas Muster (40) te chu amah hnaih bertu an ni.
79: Nadal-a’n title a lak tawh zawng zawng zat a ni a, title lak hnem lamah chuan palina a ni a. A tluk lohte chu Ivan Lendl (94), Roger Federer (97) leh Jimmy Connors (109) te an ni a. John McEnroe (77) chu a lehpel chiah a ni.
24: Nadal-a’n Grand Slam final a luh tawh zat niin, Roger Federer (30) a la pha lo a, Novak Djokovic (21) leh Ivan Lendl (19) te a lehpel tawh thung.