Mizoram University Sports (Inter College) 2017 chu March ni 24, 2017 khan zawh fel a ni a, a pumpuiah medal 12 lain Pachhunga University College an champion.

Pachhunga University College hian gold 8, silver 2 leh Bronze 2 an la a, anni hnaih ber tu chu Hrangbana College niin medal 10 an la a, gold 3, silver 3 leh bronze 4 an la a ni.

Inelna zinga ngaihhlut ber mipa Football final chu Rajiv Gandhi Stadium-ah Hrangbana College leh Pachhunga University College ten an khel a, hun pangngaiah goal awm lovin an inhnehtawk a, penalty shootout-ah PUC chuan 5-4 in hnehna an chang a ni.

Final hmuhnawm tak khelh niin, tan atangin game a tang nghal hle a, player-te pawh an innam deuh sawk sawk reng. First half-ah goal hlauhawm an nei lo ve ve, second half-ah erawh chance a awm zauh zauh reng. Paul Ramfangzaua chuan woodwork a pet per, HBC lamin an nawr na, an winger chak pahnih Malsawmtluanga Ralte leh JH Lianzuala te chuan dinglam leh veilam atangin an chhu a, PUC defender te an talbuai hle.

Hun tawp dawn minute hnih a la awm tihin PUC Defender David Lalchhuanawma chuan Joel Lalmuanpuia a pawtthlu a, referee chuan David-a hi a hnawtchhuak, hun tawp dawn tak takah HBC chuan counter attack hmangin an nawr thut a, goal an khung, mahse offside avangin goal hi an pawm ta lo. Hun a tawp a, penalty shootout hmanga chak zawk zawn a ni a, PUC an vannei ta a ni.

Major Game results :

Hockey (W)

1. HBC

2. G. Saitual

3. PUC

Basketball (M)

1. PUC

2. GAC

3. HBC

Volleyball (W)

1. HBC

2. PUC

3. GAC

Volleyball (M)

1. HBC

2. GAC

3. G. Saitual

Football (M)

1. PUC

2. HBC

Inkhel Reporter : Lalhruaizela