Mizoram Volleyball Association Invitation tournament chu october 13, 2015 (Thawhlehni) atangin Tuikual Indor Stadium-ah tan a ni dawn a. MVA Invitation Tournament team tha Services team BSF leh ARC te an tel dawn bawk a ni.
He Tournament-ah hian mipa team-te pool 2-ah then an ni a, pool match hi league-a khelh tur a ni ang a, a sang pahnih ten semi final an lut dawn a ni. Hmeichhia hi 1st Division team ten round robin league in an khel ang a. Point hmu sang pahnih ten final an khel thung ang. October 20,2015 (Thawhlehni) ah final khelh a ni ang a.
Mizoram Volleyball Association Invitation 2014 ah khan Mipa team-ah GTC, Shillong an champion-a tun tumah hian anni hi an lo tel thei dawn lo a ni. Hmeichhe team champion lai chu Power Department Sporting Club te an ni. MVA invitation khel tura team lo kal te hi sipai tem tha ve ve an ni a. BSF hi kumin inter BSF tournament neih zawh taka semi final thleng thei team an ni a. Anni hi Mizoramah an lo kal fo tawhin, Final-te pawh an lo thleng tawh a, tun tum team lo kal te hi kumdanga kan hmuh thinte aiin an rang zawk,
Champion an tum tih an inbuatsaih danah a hriat hle. ARC, Shillong team te hi North East a team tha ber pawla sawi an ni a, an team-ah hian North East-a players bakah India ram hmun dang atangin players tha tam tak an nei a ni. Mizorama an khel kan hmu thei tur hi a lawawm hle.
Mipa team-ah hian MVA 1st Division 2nd IR, Khawzawl-te chu duty pawimawh a awm avangin an in lan thei dawn lo a. State pawn team 2 leh 1st Division team te hi pool hnihah then an ni. Pool -A -ah TNT, Hunthar Volleyball Club, BSF te awmin, Pool B-ah 3rd Battallion MAP ,Young Star United , Hmingi Volleyball Club ARC, Shillong an awm thung.
Pool A-ah hian Mizoram team tha TNT, Hunthar Volleyball club leh BSF te an awm ho va. An ni team 3 inkhel kual tur hi en a chakawm. An 3 zinga team 2 in semi final an luh dawn avangin vawi 1 chakloh a pawi hle dawn a ni. TNT hi mizoram volleyball-a team tha ber zinga mi an ni renga. An fitness a tha a, an game a tluan chuan hnen theih loh tluk an ni. Hunthar Volleyball club-te hi team thar an nih avangin sawi thiam an hara. Invitation-an khelh dan hian team nihphung dik tak a hril thei ang. 2015 season opening an champion theih avangin pool paltlang an in beiseiin a rinawm a, Pool paltlang tur erawh chuan team tha tak 2 an hneh a ngai dawn a ni.
BSF hi Inter-BSF khel zo hlim leh semi final thleng thei an nih avangin kum dang aiin beisei an nei sangin a rinawm. Team danglam reng an nih avangin sawithiam an har a, Team chhia erawh an ni thei lo thung. Mizo team tan fimkhur taka khelh an ngai ang.
Pool B atang hian 3rd Battallion MAP leh ARC, Shillong-te hi chiang tura beisei mai an awl viau a. Chutih rual chuan season opening khelh dan atanga thlir chuan Young Star United leh Hmingi Volleyball Club te hi team tha lo zawkah ngaih nimahse team tha ber pawh hneh thei an ni tih kan hmu tawha. Pool ngaihnawm tak leh enchakawm tak a ni. 3rd Battallion MAP hi season opening-ah tumdang angin an result a tha tawk lova. Tun tournament hmachawn tur a inbuatsaih nasa ber team an ni hial awm e. Players tha awmkhawmna an nih avangin an chesual viau anih loh chuan harsa lo taka Pool paltlang tura beisei an ni.
ARC hi North East bakah hmundang atanga players tha awmkhawmna anih avangin team khawng tak ni tura beisei an ni a. Young Star United leh Hmingi V/C te hi club fei tak, team tha zawk anga lang te lo chai buai fo tawhin, team hriatthiam har tak an ni.
Hmeichhe team 1st Division Hmeichhe team 4 atangin Mizoram Homeguard an in lam thei dawn lova, team 3 Power Deptt. SC, Mizoram Police SC leh Electric VC te an in lan dawna. Heng team 3 te hi an inkhel kual anga, a tawpa point hmusang 2 ten final an khel dawn a ni. Semi finalist chin hian Rs 6,000/- an dawng anga. Semi final thleng pha lo team hnenah Participation prize Rs 3,000/- theuh pek an ni bawk ang.
MVA invitation mipa champion team hian pawisa fai Rs 50,000/- bakah Trophy leh medal an dawng dawn a. Pahnihna in sum fai Rs 20,000/- bakah medal leh trophy an dawng bawk ang. Hmeichhe champion team in Rs 20,000/- , trophy leh medal an dawng ang a. Pahnihna-in Rs 10,000/- medal leh trophy an dawng bawk ang. MVA invitation tournament hi LPS 10 chuan live-in a pechhuak thin dawn a ni