MVA Inter District Volleyball Tournament Final chu Febuary ni 1, Zirtawpzan khan Mamit-ah khelh a ni a, Mipa Mamit District leh Aizawl District ten final an khel a, Mamit District chuan 3-2 a Aizawl District hnehin an champion a, Hmeichhia Aizawl District leh Champhai District te chuan final khel ve bawkin Aizawl District chuan 3-0 a Champhai District hnehin an champion a ni.
Inkhelh tan hma hian khuhhawnna hun tawi hman a ni a,Pu Lianzela, President MDVA in kaihruaiin Chief Guest Pu Lalrobiaka, Hon'ble MLA, 2 - Dampa (ST) A/C in Player-te fuina thu leh kalkhawmte tan thuchah tawi; Infiammi tana insum thei a țul zia leh engkima hlawhtling tura taimak a tul thu te sawiin Tv. Joel Zodinsangan Volleyball hla thiam leh mawi takin asa a, mipuiin an lawmin thawm a țha hle
Mipa inkhelah Mamit leh Aizawl te inhmachhawnin Mamit chuan 3 - 2 (25 - 23, 22 - 25, 22 - 25, 25 - 17, 18 - 16) a hnehna changin a vawikhat nan Mizorama mipa Volleyball thiamber District nihna an hauh. Mamit Champion na kawngah Ramtea chu thawhhlawk ber a ni a, a mah thlawp tu Tlana leh Rinhlua te an khel țha bawk. Setter Chhuanliana thawhrimna leh theihna san zia hmuh hmaih theih a ni lo a, Aizawl lam tana mangchhia thlen tu bulpui ber a ni. Aizawl lamah tunlai Volleyball a hming langsar Joel-a leh Bawiha Sailo te an awm a. Semi-final thlenga an innghahna leh Player malkhaia che țhaber Joel-a ni mahse Final Match-ah chuan Bawiha a khel țha a, nidang ang tho a khel țha Joel-a a hliahkhuh kan ti thei awm e. Setter hmangaihthanga a rintlak leh pek hle; Atheihna leh thiamna khan thuk zawk leh sang zawk a la thlen tir ngei ang. Tun țum Inter District Volleyball Tournament-ah hian tleirawl țha tak tak, nakin lawka Ram pum huap a lar tur District tin hian an kawl fur bawk a ni.
Mipa Champion Maimit District hian Rs 20,000, Trophy, leh certificate an dawng a, pahnihna Aizawl District hian Rs 15,000 Trophy leh certificate an dawng ve bawk.
Hmeichhia Aizawl leh Champhai te intum ve thungin Aizawl-in 3 - 0 (25 - 15, 25 - 18, 25 - 19) a hnehna changin Mizoram Hmeichhe Volleyball thiamber District nihna an hauh a, an Champion lallukhum an humhim bawk. Aizawl chakna turin Vardingliani a thawhhlawk leh hle a, an innghahna leh game siamtu ber a ni. Champhai lamah Matei thawhhlawk viau mahse, team angin an țangrual tawk lo chu an tuar niin a lang.
Hmeichhe champion Aizawl District hian Rs 15,000 Trophy leh certificate an dawng ve bawkin, pahnihna Champhai District hian Rs 10,000 Trophy leh certificate an dawng thung.