October 14, 2015 (Nilaini) chhun dar 12:00 khan Mizoram State Sports Council chuan tun hnaia fehchhuak Mizo Climbers hlawhtling te lawmpui na hun an hmang.
October 5th-8th, 2015 chhung khan Agartala, Tripura-a 21st NE Zone Climbing Competition-ah Mizo climber pahnih Lalremruata, Kanan leh Lalhmachhuana, Govt.Complex te chuan medal pahnih ve ve an la. Lalremruata hian Senior Bouldering leh Lead-ahte silver medal ve ve a dawng a, Junior Bouldering leh Lead-ahte Lalhmachhuana'n bronze medal a dawng ve bawk.
He huna khual lian Pu C.Laltlanthanga chuan, " Mizo Climbers te tan Artificial Wall pahnih - Hawla Indoor Stadium kawt, Republic Vengthlangah leh LDSC Ground II, Lungleiah te dah a ni dawn a, heng hmun te hi Sports departmenr ram ve ve an ni. Sum pawh dah fel vek tawh a ni a, karleh maiah contractor-ten hna tanin kumin (financial year) chhungin zawhfel a ni ang" a ti. Khual lian chuan, " Everester David Zohmangaiha'n hma a hruai tawh a, a thlen ang thleng thei turin Mizo infiammiten talent kan nei a, kan mamawh chu huaisenna a ni. Hlawhtling tur chuan huaisen a ngai a, kal kalsan lam ni lo kan hmachhawn tur chiah kan thlir a ngai" tia fuihna thu sawiin Mizo climber medal latute an kalzelna turah duhsakna a hlan.
He huna thusawitu dang David Zohmangaiha, Mizoram Climbing Association President pawhin, " Kum 2020 Olympic-ah Climbing telh a ni tawh dawn a, vawiina kan hrual chhoh mek kan naute hi 2020 Olympic-a tel ve phak mai ni lo, Mizo infiammi zinga Olympic medal la hmasa ber ni tura hrual kan tum a, kan tih theih ngei pawh kan ring a ni" a ti ve bawk.
Zonunthara, Secretary Mizoram Climbing Association chuan kum 2010-ah an din tan thu sawiin tum thum an fehchhuahna a nih thu leh tun tumah hian climbers 11 an tirh thu a sawi. Mizoram Climbing team hi Manager Lalrawngbawla leh Coach TC Zothantluanga-ten an hruai a, Mizoram Climbing Association hi Indian Mountaineering Foundation hnuaia awm an ni.
Climbers medal lawmna inkhawm hi Pu James Lalramnghaka, AE, MSSC chuan kaihruaiin medal latute hnenah MSSC chuan lawmpuina thilpek a hlan leh theuh a ni