February ni 13, 2017 khan Mizoram Super League Board chuan qualifying khel mek Champhai Minikins an inhnuhdawh avanga VR4 te an qualify tak thu thuchhuah a siam.
February ni 9, 2017 zan khan Minikins chuan VR4 an hneh a, mahse February ni 10 zana match an khel leh tur chu disqualified an ni ta a, Minikins disqualified an nih chhan chiang fak hi MSL Board chuan an tarlang lo.
Appeal hun an siam sak a, nimin khan joint meeting neihpuiin, an khelh tawh sa zawng zawng nawhreh leh a, a bul atanga khel tha tura tih an ni a, VR4 leh Dawrpui Vengthar te chuan pawm mahse Minikins chuan an pawm ve thei ta lova, MSL qualifying atangin an inhnukdawk zui ta a ni.
Official Statement-ah MSL Board lam hian buaina chiang fakin an ziak lang lo, 'buaina' tih leh 'thil felhlel' tiin a tarlang deuh mai. Chutih laiin Minikins Press Release ve thung erawh chuan 'an that lohna tur ngawr ngawrin Board lamin a rel' nia ngaih theihin an tarlang.
Buaina ril zawk a awm tihna a ni thei ang em?
MSL Qualifying khel turte chu players chungchang, transfer chungchang thlengin; documents fel tak thehlut tura tih an ni. Hemi chungchang hi MBBA lam chuan chiang fakin club pathum a hrilh vek.
February ni 8 khan checking neih a ni a, Champhai Minikins chuan MSL Board lamin documents an phut ang an pe thei lo, MSL Board chuan match an khelh hnuah pawh document kim an thehlut a nih chuan an pawm tur thu thlengin ngaihhnathiamna sang tak nei chungin an nghak.
February ni 9-a VR4 an hneh hnuah pawh document kim an la thehlut lo cheu a, Board lam chuan Minikins hi an dil nawn leh nghe nghe. Chuta an document thehluh leh an meeting minute thehluh a inmil thei ta lo! Technical committee chuan 'Document phuahchawp, mi bum tumna' nia ngaiin a disqualified ta a ni.
CDBBA atanga hriatthiam dilna chu MSL Board lamin a dawng a, Minikins chu appeal hun an siamsak a, chutah chuan Minikins documents fel lo chu tihfel sak a, ngaihhnathiamna nei chunga a tir atanga khel tha leh turin Board chuan a rel, hei hi Minikins chuan an pawm thei ta lo a ni.
MSL Board lam hian engatinge a tirah thil chiang fakin an sawi loh?
MSL Board-in Minikins an disqualified thu an tarlang, mahse an disqualified chhan chiang fakin an tarlang lo. Kha kha enge a chhan ni ta ang? Helai tak hi ngaihtuahna ti thui ta chu a ni e. Board lam hian Minikins hi ngaihhnathiamna sang tak an neih avangin chance an pe tihna a ni thei zawk ang em? Documents dik lo chung pawhin khelh theih dan an ngaihtuah sak tihna a ni thei angem?