February ni 20, Thawhlehni zan Mizoram Super League (MSL) Season 4 game 12-na khelh a ni a, Khatla TBL leh Tuikual South inhmachhawnin Tuikual South chuan 74-70 in Khatla TBL an hneh.
Khatla TBL hi team hlauhawm ni thin mahse, MSL 4-ah beisei an la phak lo. Vikings leh BCA leh Tuikual South an hneh lo a, MSVT Hollow leh Republic Vr4 an hneh thung. Match 5 khel tawhin League Round an match hnuhnung ber a ni a, point 7 neiin midang result a zirin semifinal an khelh leh theih tur leh tur loh a la chiang lo.
Tuikual South hian Match 4 khel tawhin point 6 an nei tawh a, Mission Veng Vikings leh Zarkawt BCA an hneh lo mahse, MSVT Hollow leh Khatla TBL an hneh. Match khat khelh hmabak an la nei a ni.
Tuikual South hian bul an tan tha a, hmahruaitu zawkah an tang nghal chutih rualin Khatla TBL an khel chhe bik lo. Tuikual South an thawh hona a tha a, chakphu zawk an chak a ni. F Zodinthara (25pts) Vanlalrinchhana (14pts) leh Lalmuanpuia Zote (16pts) hnehna an channa a tan an thawh hlawk hle.
First quarter-ah Tuikual South hmahruaitu zawkah tangin F Zodinthara chuan (11pts) zet a thawk chhuak a, Khatla TBL tan Simon Lalremruata chuan (8pts) thawk chhuak ve bawkin second quarter-ah Khatla TBL tan Gospel Lalthawmmawia chuan (10pts) rawn thawk chhuakin point 1 chiahin an umphak lo thung.
Thirs quarter-ah Khatla TBL insiam thain Gospel Lalthawmmawia chuan (9pts) a rawn thawk chhuak bawk nen hmahruaitu zawkah an tang ta a ni. Quarter hnuhnung berah pawh Khatla TBL chak zawk tur a rinkai zawk ni mahse, hun pawimawhah turnover an ngah an tuar ta a ni.
Tuikual South an beidawng lo hnehna chan ngei tum an nawr ve bawk. Huntawp dawn 4mins ala awmin F Zodinthar leh Lalmuanpuia Zote chuan an huntha neih rawn hmang tangkaiin danglamna an rawn thlen ta a ni. Khatla TBL chuan hnehna chan ngei tumin time out call mahse, Tuikual South an che sual duh bik lo. Hun atawp meuh chuan Tuikual South chuan 74-70 in hnehna an chang ta a ni.
Khatla TBL 70-74 Tuikual South
1st Q: 14-17 : 2nd Q: 31-32
3rd Q: 53-48 : 4th Q: 70-74
Tuikual South hian an league round an match hnuhnung February ni 22, Ningani zan dar 7:30-ah an khel ang a, Republic VR4 an hmachhawn ang.