​MSL 4: Khatla TBL-in Republic VR4 an hneh hram

16th February 2018, 06:02PM

February ni 15, Nilaini zan Mizoram Super League (MSL) Season 4 game 10-na khelh a ni a, Khatla TBL leh Republic VR4 te inhmachhawnin Khatla TBL chuan 69-63 in kaithar Republic VR4 an hneh.

Khatla TBL hi MSL 1 leh 2-ah champion an nih bakah MSL 3-ah final an lut a, MSL 4-ah erawh beisei an phak chiah lo a, an elpui ber tura ngaih Zarkawt BCA leh Mission Vikings an hneh lo. Vawi 4 khel tawhin vawi hnih an chak a, vawi 2 chak loh neiin point 6 an nei tawh a, Tuikual South an hmachhawn leh ang a, hnehna an chan chuan semifinal an lut ang.

Republic VR4 hian an match hmasa berah Hollow an hneh hnuah chak hmel an la hmu leh lo. An tan semifinal luh beisei a bo hle a ni. Match li khelh ve tawhin point 5 an nei tawh a ni.

Republic VR4 hian bul tan tha zawkin inkhel an thunnun zawk mahse hun pawimawhah turn over an neih an tuar thung a, fisrt quarter atawp meuh chuan Khatla TBL chuan 14-13 in hmaanhruai ta zawk a ni.

Second quarter-ah Republic VR4 insiam thain hmahruaitu zawkah an tang thung a, Lianhmingmawia (10pts) leh Lalnunmawia Sailo (6pts) an thawh hlawk bakah midangin an thlawp tha bawk nen VR4 chuan 35-28 a hmahruaiin chawlhlawk an hmang ta a ni.

Third quarter tan a ni a, Republic VR4 bawk chungnung zawkah tangin hnehna chang ngei tur a, rinkai zawk ni mahse, quarter hnuhnung berah Khatla TBL chuan an tawnhriat neih that an rawn hmang tangkai thung a, huntawp dawn minute 2 ala awmin an inthlauhna chu point 3 chauh a ni tawh. Khatla TBL tan Vanchuangpuia (Chpa) hun pawimawhah a rawn che tha a, point 16 zet thawk chhuakin an chakna hnar a ni. Chak zawk tur rin thiam a har tak karah hun atawp meuh chuan Khatla TBL chuan 69-63 in hnehna an chang ta a ni.

Republic VR4 tan Lianhmingmawia chuan double double neiin point 21 hlawh chhuakin rebounds vawi sawm pakhat a nei a, assist vawi hnih leh steals vawi khat a nei bawk. Lalbiakkima chuan point 12 hlawh chhuak ve bawkin rebounds vawi li, assist vawi hnih leh steals vawi hnih a nei ve bawk.

Khatla TBL tan Vanlalmuana chuan point 10 hlawh chhuakin rebounds vawi li, assist vawi hnih leh steals vawi hnih a nei a, Simon Lalremruata chuan point 8 hlawh a chhuak ve bawk

Khatla TBL hian February ni 20, Thawhlehni zanah zan dar 7:30-ah Tuikual South an hmachhawn ang a, Republic VR4 hian February ni 22, Ningani zan dar 7:30-ah Tuikual South an hmachhawn ang.

Copyright © inkhel.com 2024. All rights reserved.