March ni 20, Thawhlehni zan khan Hawla Indoor Stadium Republic Vengthlangah Mizoram Super League (MSL) Season 4 final game 1 khelh a ni a, Zarkawt BCA chuan 75-68 in Tuikual South an hneh. Final game 2 hi March ni 22, Ningani zan dar 8:00-ah khelh leh tur a ni a, Zarkawt BCA hian hnehna an chang nawn anih chuan MSL-ah a vawi khat nan no mawi an chawi dawn a ni.

Zarkawt BCA hian semifinal game 1-ah  73-69 in Khatla TBL an hneh a, semifinal game 2-ah Khatla TBL chuan 62-59 in Zarkawt BCA an hneh ve thung. Semifinal game 3 khelh a ni a, Zarkawt BCA chuan 71-67 a hnehna changin Zarkawt BCA chuan final an lut a, Tuikual South hian semifinal game 1-ah 60-59 in champion lai Mission Veng Vikings an hneh a, semifinal game 2-ah Tuikual South chuan 68-56 a hnehna an chang leh in final an lut ve bawk.

Zarkawt BCA hian bul tan tha zawkin inkhel an thu nun zawk a, quarter tinah hmahruaitu zawkah tangin harsatna awm lo in hnehna an chang a ni. Hnehna an channa atan hian Dennis Lalmuanpuia 18pts, Zonunsanga 16pts, Lalrina Renthei 15pts leh Lalremsanga 10pts te an thawh hlawk hle a, an thawh hona a tha hle bawk.

Tuikual South hian bul an tan that loh an tuar a, insiam that tumin quarter thumnaah an khelh dan thlak mahse, hnehna chang turin an thawh hona that tawk loh an tuar a tih theih awm e. Lalnunpuia Remthlei 22pts leh F Zodinthara 14pts te thawh hlawk hle mahse hnehna chang turin a tawk zo lo.

First quarter-ah Zarkawt BCA chuan hmahruai nghalin Zonunsanga 8pts leh Jackson Lalrintluanga 6pts te an thawh hlawk hle a, Lalremsanga leh Lalrina Renthei sawi hmaih theih an ni lo bawk. Second quarter-ah pawh Zarkawt BCA bawk hmahruaitu an ni a, Dennis Lalmuanpuia 8pts a thawh hlawk hle a, midangin an thawp tha hle bawk. Tuikual South tan R Lalnunpuia 6pts langsar ve bawk mahse midangin an thawp tha tawk lo.  Second quarter a zawh meuh chuan 44-23 a Zarkawt BCA chuan hmahruaiin chawlh lawk an hmang ta a ni.

Third quarter-ah Tuikual South insiam tha in Lalnunpuia Renthlei 8pts leh F Zodinthara 8pts an thawh hlawk hle a, hnehna chan tumin nawr viau mahse, bul an tan that loh avangin Zarkawt BCA bawk chungnung zawkah an tang a ni. Quarter hnuhnung berah Tuikual South chuan hnehna chan an tum ruh hle a, an thawh hona pawh a tha; Lalnunpuia Renthei chuan 12pts zet a hlawh chhuak a, Zarkawt BCA pawhin hnehna chan ngei an tum ve bawk avangin Zonunsanga leh Lalrina Renthei te an thawh hlawk ve bawk nen Tuikual South tan hnehna chang turin hunin a daih tawh lo. Zarkawt BCA chuan 75-68 in hnehna an chang ta a ni.

Zarkawt BCA 75-68 Tuikual South
1st Q: 24-11, 2nd Q: 44-23
3rd Q: 59-46, 4th Q: 75-68

(adsbygoogle = window.adsbygoogle || []).push({});