March ni 17, Zirtawp zan dar 8:00 PM khan Mizoram Super League Season 3 khuh hawnna hun Lalthanhawla Auditorium Treasury Square-ah neih a ni a, MBBA hruaitu te leh club tin hruaitu te bakah players te an kal tha hle.  MSL Season 3 hi March ni 21, Thawhlehni zan dar 7:00 PM-ah khelh tan ani ang a, Khatla TBL leh Chanmari Hollow BBSP ten an khel ang.

 MSL 3 khuh hawna hun hi Nl Leni Ralte chuan kaihhruaiin,  Khuallian Pu Hmingdailova Khiangte Hon'ble Parliamentary Secretary SYS chuan MSL 2017 khuh hawnna a nei a ni.  MSL 3-ah hian Club paruk awmin, Khatla TBL, Chanmari Hollow BBSP, Tuikual South BC, Zarkawt BCA, Mission Veng Vikings leh Zarkawt Serpents te an ni.

MSL vawihnih neih tawhah Khatla TBL champion lai an ni a, MSL 3-ah hian team tinin state pawn player pahnih an la thei ang. MSL 3-a pangana leh parukna ten relegation playoff an khel ang a, a chak zawk hian MSL khel chhunzawm turin MBBA Division I-a pahnihna Dawrpui Vengthar SC an hmachhawn dawn a ni.

Tip Off hunah hian Pu Lalrinfela, Chairman, MSL Board hnen atangin thusawi ngaihthlak a ni a, Basketball hmasawna atana MBBA hmalakna leh ZOnet cable-te inpeknaah lawmawm atih thu sawiin, India aiawh players awm chhun H Laldinsanga (Mapuia) aia thleng sang tura theihtawp chhuah zel turin player te a fuih bawk.

Club tin Model ten club Jersy an rawn pho chhuah hnuin, team captain theuh an lo chhuak a, Pu KC Lalliantluanga, NIS chuan thutiam a neih pui hnuah Pu Chalrosanga Ralte, MLA President, MBBA chuan handbook tlangzarhna hun a hmang zui ngal a ni.

Khuallian Pu Hmingdailova Khiangte, Hon'ble Parliamentary Secretary, SYS hnen atangin thusawi ngaihthlak a ni a, sorkar hmalakna zarah thalai ten infiamna hrang hrangah hma kan sawn a, Basketball-ah pawh kan thlen chin atanga hmasawn turin tang i la, MBBA leh club ten mahni mawhphurna theuh hlen tura theih tawp chhuah a ngaih thu sawiin MSL khel tur player zawng zawng te duhsakna a hlan bawk.

(adsbygoogle = window.adsbygoogle || []).push({});