​MSL 3 Mission Veng Vikings chuan Tuikual 'S' hnehin Final an lut

11th May 2017, 05:05AM

Mizoram Super League Season 3 semifinal hmasa zawk game 1-ah Mission Veng Vikings chuan 89-59 in Tuikual South an hneh a, May ni 10, Nilai zan khan R Dengthuama Indoor Stadium-ah game 2 khelh leh a ni a, Mission Veng Vikings chuan 93-82 a hneh leh in, final an lut ta a ni.

Mission Veng Vikings tan Ronald March chuan bul tanin a thawh hlawk hle a, an chakna hnar a nih rualin Michael F Lalawmpuia leh Lalchhanhima te an thawh hlawk hle bawk. Ronald March hian double double a neih bakah second quarter-ah a dunk bawk a ni.  A pumpuiah point 38 zet a thawk chhuak a, rebound vawi 12 a la bawk. Michael F Lalawmpuia hian point 19  thawk chhuakin  Lalchhanhima hian point 13-a thawk chhuak ve bawk.

Tuikual South chuan mizo hlangin bul an tan a, Mission Veng Vikings tan Ronald March chuan bul a tan thung. Viking chuan inkhel thunun zawkin Ronald March chuan point 11 score-in Michael F Lalawmpuia, Lalruatliana leh Lalrina ten an thlawp tha hle bawk. Second quaeter-ah Tuikual South tan Nicolas Daniel rawn lut mahse beisei a phak loh bakah midangin an thlawp that tawk lo. 

 Mission Veng Vikings tan Ronald March chuan a dunk bakah point 12-a score nghe nghe a, Lalchhanhima leh Michael F Lalawmpuia ten an thlawp tha bawk nen second quarter a zawh meuh chuan Vikings chuan 49-39 a hmahruaiin chawlh lawk an hmang ta a ni.

Third quarter-ah Vikings chuan turnover an ngah bakah an thawh hona that tawk loh an tuar a, Tuikual South an che tha chho tan F Zodinthar, MS Dawngzela leh Vanchuangpuia te rawn thawh hlawk hle mahse, quarter hnuhnung berah  Vikings  an harh chhuak  thung.  Ronald March leh Lalchhanhima te an rawn thawh hlawk hle a, Ronald March chuan point 12 score-in Lalchhanhima chuan a rawn thlawp tha bawk nen hun a tawp meuh chuan Mission Veng Vikings chuan 93-82 in hnehna an chang a,  Mizoram Super League Season 3 final lut hmasa ber an ni ta a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.