​MPL5-ah tunge semi final lut dawn? Tunge tla dawn?

21st November 2016, 08:11PM

McDowell's No.1 Soda Mizoram Premier League Round 13 khelh a ni tawh, Round khat chiah kan hmabak tawh a. Team ti tha 4 ten semi final an khel anga, team point hmu hniam ber an relegate anga, team point hmu hniam ber dawt chuan playoff a khel dawn a ni.

Round 13-na thlengin a chunglam leh a hnuailam engmah chiang a la awm lova, league leader ni tur pawh a la hriat loh, chutiang chiahin relegate tur pawh a la hriat loh a ni. Khelh 13 atangin Chanmari FC chuan 26 points hmuin league hma an hruai a, an hnuai chiahah Bethlehem Vengthlang awmin point 24 an nei. Aizawl FC chuan 21 points an nei a, 3-na an ni mek a, Chanmari West FC chuan 18 points neiin 4-na an la ni hram hram.

Semi final khel tur team 3 a chiang tawh a, Chanmari FC, Bethlehem Vengthlang FC leh Aizawl FC te chuan semi final an khel dawn. Chhinga Veng FC leh Chanmari West FC te karah hian a tu zawk hian nge semi final khel dawn a la hriat loh. November ni 24 zan dar 7:00-ah Chanmari West FC leh Chhinga Veng FC an la inhmachhawn dawn zui, tu results-ah mah an innghat lo, semi final luh leh luh loh chu anmahni kut zalah a tla dawn a ni.

Dinthar FC an relegate thei tawh lo, mahse play-off khelh erawh an duh dawn lo chiang, 13 points neiin 6-na an ni mek a, 12 points nei Ramhlun North FC chu 7-na an ni. Zo United FC chu 9 points neiin a mawngphahah an awm mek a. Ramhlun North FC hian relegate an duh lo a nih chuan November ni 24-a an hmachhawn tur Dinthar FC hi an draw emaw tal a ngai dawn.

Ramhlun North FC hi an chak lo a nih vaih chuan Zo United FC hi a mawngphah atangin an zuangchhuak thut thei reng bawk si a. Ramhlun North FC leh Dinthar FC inhmachhawn tur hi a hmuhnawm dawn a, Dinthar FC hian play-off khelh an duh lo a nih chuan draw emaw tal a ngai dawn a ni.

Zo United FC chuan November ni 25 zanah Bethlehem Vengthlang FC an hmachhawn dawn a, him an duh chuan Bethlehem Vengthlang FC an hneh a ngai a ni mai. Hetih lai hian midang results-ah an innghat dawn a, Zo United an himna tur chuan hnehna an chan bakah Dinthar FC-in Ramhlun North FC an hneh a ngai a ni.

Semi final-ah hian league leader-in 4-na a hmachhawn anga, pahnihna leh pathumna an inhmachhawn bawk ang. Round 14 khelh zawh a nih hma chu semi final-a inhmachhawn tur kan la hre thei lo. Chutiang bawkin relegate tur leh play off khel tur pawh tun dinhmunah chuan kan la hre thei rih lo a ni.

Round 14 Fixtures hi en vang vang la, en chakawm vek a ni tih i hre thei ang.

November 24, Ningani

4:00 PM Ramhlun North Vs Dinthar FC

7:00 PM Chanmari West FC Vs Chhinga Veng FC

November 25, Zirtawpni

7:00 PM Bethlehem VT Vs Zo United

November 26, Inrinni

7:00 PM Aizawl FC Vs Chanmari FC

Copyright © inkhel.com 2024. All rights reserved.