​MPL Semi Final 1st leg-ah Chanmari FC-in Aizawl FC an sawp

03rd December 2016, 03:12AM

McDowell's No.1 Soda Mizoram Premier League semi final 1st leg match hnuhnung zawk chu December ni 2, 2016 khan khelh a ni a, Chanmari FC chuan 4-1 laiin Aizawl FC an sawp a. Aizawl FC dinhmun a tha lo hle, 2nd leg-ah hna hautak tak thawh tur an nei dawn ta a ni.

Chanmari FC tan Vanlalbiaa, Fela Zote leh Lalrinchhana ten goal an khung a, Rohmingthanga chuan an lamah a ti goal bawk. Aizawl FC tan Lalawmpuia Hnamte chuan goal khat a khung bawk a ni. Hun tawp lamah Aizawl FC defender Ricky Lallawmawma chu yellow card pahnihna a chawi avangin hnawhchhuah a ni a, Chanmari FC midfielder Lalrinchhana chu man of the match-a thlan a ni.

Chanmari FC 4-1 Aizawl FC

(Vanlalbiaa 3', Fela Zote 11', Rohmingthanga 22'OG, Lalrinchhana 49') (Lalawmpuia Hnamte 21')

Man of The Match : Lalrinchhana (CFC)

Red Card : Ricky Lallawmawma 77' (AFC)

Chanmari FC XI : F. Lalmuanawma, Umunnakwe Ugochukwu Godswill, Lalrinchhana Tochhawng, Thomas Lalengkima, C. Lalrosanga, R. Malsawmtluanga, Lalrinchhana, Vanlalbiaa Chhangte, Lalruatfela Zote, Malsawmfela, Dodoz.

Aizawl FC XI: Zothanmawia, Jonathan Lalhriatkima, Ricky Lallawmawma, Lalawmpuia Hnamte, Brandon Vanlalremdika, Rohmingthanga, Lalnuntluanga, William Lalnunfela, Bright Middleton Mends, Lallawmzuala, Hmingthanmawia.

An central defender rinrawl an inhliam avangin Aizawl FC chuan an tlar hnung an duhthusamin an rem thei lo. Goal pawh an chhuah nghal a. Tan atanga minute 3-na lekah corner atanga ball kal zel chu Mabiaa chuan a tauh goal. Rei an inkhel hman lo, Fela Zote chuan Chanmari FC goal hnihna 11 mins-ah a khung chhunzawm nghal!

Mual dinglam sir atanga ball lo kal chu Fela Zote chuan dawngin defender a step over khum hnuah veilam sir takah a ke veilamin kawh zetin a pet goal a, si hnih faiin Chanmari FC chuan hma an hruai ta der mai. Aizawl FC chuan 21 mins-ah an chhanglet a, corner atangin Lalawmpuia Hnamte chuan tauh lutin Aizawl FC tan goal khat a khung.

Game a tang chho dawn zel nia a lan laiin Aizawl FC defender an chesual leh hlauh mai. 22 mins-ah box veilam atangin Mabiaa chuan T Mawia a chip khum, Rohmingthanga chuan tauh chhuah a tum, mahse a chesual ta, an lamah a tauh goal ta a ni. Half time a ni a, 3-1 in Chanmari FC chuan hma an hruai a.

Second half tan a ni a, Chanmari FC chuan goal an khung lehnghal zat mai. Box pawn 25 yards vel atangin kawh zetin top corner-ah Lalrinchhana chuan a pet goal ta mai! Goal mawi leh ropui tak a ni chiang. 4-1 in Chanmari FC chuan hma an hruai a. Aizawl FC an la beidawng lo, bench atanga lut B. Zoramthara chuan penalty a hlawhchhuak a, a penalty hlawhchhuah hi pet mahse Chanmari FC goalkeeper Muanawma chuan a lo dang.

Hun tawp dawn minute 12 a la awm tihin Aizawl FC defender Ricky chuan yellow card pahnihna chawiin referee chuan a hnawtchhuak a. 4-1 in Chanmari FC chuan hnehna an chang ta a ni. He match-ah hian goal mouth action a tam hle a. Chanmari FC chuan chance an ngah zawk a, midfield-ah pawh ro an rel chiang hle bawk. Chanmari FC tan DoDoz a tal na hle a, halfwayline atanga a khalh phei; a shot chu T Mawia'n a lo dang hlauh a, goal ngat selang chuan goal ropui tak ni tur a ni.

DoDoz-a'n box veilam sir atanga a cross Malsawmfela shot pawh a goal teuh hle bawk. Vanlalbiaa chuan box pawn atangin kawh zetin a shot a, Aizawl FC goal bar a per dawp bawk a ni. Tin, hun tawp dawnah R. Malsawmtluanga free kick tha zet chu T. Mawia chuan a lo dang bawk a, Chanmari FC hian goal dang pawh khung theihna chance an nei nual a ni.

Aizawl FC lamin hun tir lamah chance an nei ve nual a, box veilam sir atanga William-a cross Chanmari FC goalkeeper Muanawma save per chu Brandon chuan a tauh a, a goal ngei dawn nia a lan laiin Rosanga chuan goal line atangin a lo tauh chhuak hlauh a. Rohminga ball pek Bright Middleton Mends chuan a pet goal ngei dawn nia a lan laiin Muanawma chuan a lo dang bawk a, he match hi match hmuhnawm tak a ni a, Aizawl FC chuan final lut turin hna hautak tak an thawh a ngai dawn a ni.

Photo : PC Lala

Copyright © inkhel.com 2024. All rights reserved.