​MPL 5 kickoff a ni ta

27th August 2016, 07:08AM

McDowell's No.1 Soda Mizoram Premier League Season 5 Kickoff chu August ni 26, Zirtawpni zan khan Lal Thanhawla Auditorium, Treasury Square-ah neih a ni a, AIFF Vice President Larsing Ming chuan MPL 5 hi a Kickoff a ni.

Mizoram Premier League season 5 hi September ni 1 atangin tan a ni dawn a, kum danga MPL khelhna thin AR Lammualah khelh leh a ni dawn a, chawhnu lamah leh zan lamah khelh a ni leh dawn a ni.

MPL5 khuhhawnna hi Bd-i'n zei takin a kaihruai a, zaithiam Mawitei leh DJ-i ten kalkhawm mipuite thiam takin an awi bawk a ni. He hunah hian Mizoram Football Association hruaitute leh MPL Club hruaitu leh player leh staff-te an kim hle.

MFA Presidengt Pu Lalthanzara chuan Zonet Cable Private Ltd. inpekna fakin main sponsor McDowell's No.1 Soda leh Co-Sponsor Gionee te chungah Mizoram Football hmingin lawmthu a sawi bawk. Tin, India ram pum huapa Mizoram phochhuahna Football lama sawrkar hmalakna chu MFA President chuan a fak bawk a ni.

Club tin captain-te chu a mal malin kohchhuah an ni a, thianghlim taka khel turin thu an tiam theuh a, Oath-taking hi chu Pu Lalruatsanga Tochhawng, MFA Fin. Secy chuan a kaihruai a ni.

MPL season 5 Main Sponsor McDowell hotupa Vipallava Raj Singh chuan Handbook a tlangzarh a, hemi hnu hian Mizo nula chhelo tak takte chuan Mizoram Premier League season 5-a club tin kit an rawn phochhuak ta a, model-te chevel hi mipui lamin an khamlo hle nghe nghe a ni.

AIFF Vice President ni lai leh Shilong Lajong neitupa ni bawk Larsing Ming chuan MPL 5 chu Kickoff-in MPL Board Secretary Pu Lalnghinglova Hmar chuan MPL 5 kalphung tur a sawi chhunzawm a. MPL5-ah hian league hmasa kalphung angin vawi hnih theuh an inkhel kual leh anga, point hmu sang palite chuan semi final two legged tie-in an khel ang. Final erawh two legged-a khelh a ni dawn lo a ni.

MPL 5 Round 7 chu Champhaiah khelh a ni ang a, October ni 6 leh October ni 7-a khelh tur a ni a anga, Champhai lamah MPL match hi Zonet chuan Live telecast-in a pe chhuak dawn tho a ni.

Copyright © inkhel.com 2024. All rights reserved.