Nimin tlai khan Manchester United chuan kum hnih chhung an lo chhawr tawh Van Gaal chu manager atangin an ban a, Jose Mourinho chuan nizan khan London-a a in a chhuahsan ve bawk, English media-te chuan tunkar chhung hian Jose chu Man Utd manager a ni tih puan a ni dawn niin an tarlang.

Zlatan-a'n Mourinho hnung a zui dawn?

Inter Milan boss hlui Mourinho-a'n Man Utd a enkawl chuan PSG chhuahsan mek Zlatan Ibrahimovic chu Old Trafford-ah a seng lut mai dawn niin Mirror chuan a tarlang a. Kum 34 mi Zlatan hian a ram chu Euro 2016 a hruai thleng a, Euro khelh a nih hma ngeiin a club thar tur tihchian a ni hman dawn nia report a ni.

Mourinho-a'n London-a a chenna in a chhuahsan

Tun nipui hian Paris St Germain-a a contract a tawp tak avangin Zlatan chu free agent a ni a. Amah ngeiin Premier League lama kal a chak thu a lo sawi tawh thin a nih kha. Zlatan hian Inter Milan-a a pu hlui a pan ngei dawn nia sawi a ni a. Kar khat chhunga £250,000 vel hlawh a duh nia sawi a nih bawk a, hei hi United chuan an pe thei dawn niin a lang a, Zlatan chuan club thar a zawm leh chuan kum khat atan contract ziah a duh thu a lo sawi tawh a nih kha. Thenkhat chuan Zlatan hi Mourinho-a assistant a ni dawn niin an lo sawi ve mek bawk.

Giggs a chhuak dawn ?

Jose Mourinho-a'n Man Utd a enkawl dawn chuan United chhungkuaah thil danglam a awm nual dawn niin a lang a. Van Gaal-a assistant Ryan Giggs pawh a chhuak ngei dawn nia sawi a ni. David Moyes ban a nih khan Giggs chuan United hi reilote chhung a enkawl a, Van Gaal-a hnuaiah a awm leh a, Mourinho chuan Giggs thawhpui a chak nia sawi a nih laiin Giggs hian ama puala team enkawl a thlang ve tawh dawn niin The Sun chuan a tarlang a ni. Giggs hian United a chhuahsan a nih chuan a naupan lai atanga a club chu a vawi khat nan a chhuahsan dawn tihna a ni dawn a ni.

Van Gaal ban man a to

Nimin khan Van Gaal chuan United trainning ground a tlawh a, Man Utd hotute nen thil an sawi ho hnuin United a chhuahsan ta a. Kum 3 chhung contract nei mahse 250 million pound chuang a sen hnuah Man Utd chu FA Cup chiah a chawipui theih bakah season tharah Champions League an khel thei dawn lo zui bawk nen, United hotute chuan a chungah rinna an nghat ngam ta lo a ni.

The Last Goodbye

Van Gaal hian kum khat dang United-ah contract la nei mahse an ban tak avangin compensation sum tam tak Old Trafford atangin a ak chhuak dawn thova, £18million in kum thum chhung atan contract an ziak, kum khat chhung a contract hlut zawng chu £6million a ni a, Man Utd hian Van Gaal an ban avangin £6million vel chu compensation atan an thehchhuak ngei dawn a ni.

Mourinho-a'n player leina tur sum a nei hnem dawn?

Man Utd nen engzat chiahin nge an inrem dawn tih sawi theih a la ni lova, report thenkhat chuan £18million in kum 3 atan an inchhawr dawn niin an lo sawi ve mek bawk. Mourinho-a'n United a enkawl chuan player pawh an insiksawi nual dawn nia ngaih a ni a, Chelsea-a a duh tawh loh Mata chu chhuak hmasa ber zinga tel tura ngaih a ni.

Mourinho hian Chelsea a enkawl laia a player awh em em Everton defender John Stones chu Old Trafford-ah a seng luh ngei a rinawm bawk a, Dortmund hmatawng Pierre-Emerick Aubameyang leh Real Madrid-a player chuangtlai James Rodriguez -te pawh Mourinho-a target nia ngaih an ni a, United hotute chuan team thar din nan sum thahnem tak Mourinho hi an pe dawn nia sawi a ni a, tun nipui bazar lo inhawng tur chu Man Utd transfer bazar a ni mai dawn niin a lang.

Pictures Credit : Getty