14 Sep 2018 04:55

inkhel

MotoGP 2019 season hawnna Qatar

MotoGP chuan 2019 season calendar an duan chhin chu an tlangzarh a, a hma ang bawkin Qatar Grand Prix chu a bul tanna atan an la hmang zel dawn a ni.

Season thar bul tanna atan Losail International Circuit-ah an intlansiak hmasa ber dawn niin MotoGP commercial rights holder Dorna Sports chuan an tarlang a. He calendar hi 2018 chhunga Grand Prix 19 intihsiakna behchhana siam a ni a, intlansiakna thar an telh ta rih lo a ni.

Finland leh Mexico te chuan 2020 vel atanga intlansiakna hmun zinga tel ve theih tumin hma an la a, mahse MotoGP hian an la pawmsak ta rih lo a. Kum 10 chhung an lo kalpui tawh angin Qatar atang hian bul an tan ang a, round 19 chhung chu an intlansiak leh dawn a ni.

Kumin aiin kum tharah chuan kar khatin MotoGP season hi an tan hma zawk dawn a, ruahman dan chuan March 10 atangin an tan ang a, a lehpeka Argentina Grand Prix neih hmain kar hnih chhung an chawl leh rih dawn a ni.

Argentina Grand Prix zawhah hian American Grand Prix a awm leh ang a, kar hnih an chawlh leh hnuah Jerez-ah European Grand Prix a awm leh dawn bawk a ni.

2020 ah chuan kar hnih an chawlh huna kar khat hi chu Mexico atan ruahman chhin niin an sawi a, engmah sawi chian erawh a la awm lo a. Hetianga an kalpui a nih pawhin Austin nen an inkawptir maithei niin thuneitute chuan an sawi.

July thlaa nipui chawlh an neih thin chu kuminah kar hnih chhung awh tura duan a ni a, kum tharah chuan kar thum chhung chawl turin ruahmanna hi an siam a. Assen-Sachsenring leh Misano-Aragon te chuan chawlh hi an zui dawn a ni.

Season tan hmaa test neih velna atan tun season ang bawkin Brno leh Austria te chu an thlang leh a, Japan-Australia-Malaysia indawt dan pawh season tharah chuan kalpui zel a la ni dawn a ni.