Monaco GP pole position changtu Daniel Ricciardo

27th May 2018, 02:05AM

Pathianniah Formula 1 intlansiak a awm leh dawn a, Monaco Grand Prix chu zan dar 6:40 atangin an tlan tan ang. Inrinniah qualifying an tlan a, hetah hian Daniel Ricciardo chu a che tha ber a, pole position a chang.

Red Bull driver Ricciardo hnung chiahah Ferrari driver Sebastian Vettel awmin, Mercedes driver Lewis Hamilton chu pathumnaah a ding ang. Ferrari driver pakhat Kimi Raikkonen chu palinaah a awm a, a hnungah hian Mercedes driver Valtteri Bottas awmin, Force India driver Esteban Ocon chu paruknaah a awm bawk a.

Ocon hnungah han McLaren driver Fernando Alonso a awm dawn a, Alonso hnung chiahah Renault driver Carlos Sainz a awm ang a, Force India driver pakhat Sergio Perez chu pakuanaah a awm a, a hnungah hian Toro Rosso driver Pierre Gasly a awm bawk.

Red Bull driver pakhat zawk Max Verstappen chu qualifying-ah hian a chesual a, a hnung atangin a tlan tan dawn a. Verstappen hian a duhthawh deuh thin bawk a, a zawnin intlansiak vawi 6-ah a chesual ta a, a tlan duh dan hian sawisel a hlawh tan mek.

Lewis Hamilton chuan tun season chhunga an intlansiak tawhah point a la hmu sang ber a, amah hnaih bertu German driver Sebastian Vettel aiin point 17 in a sang tawh a ni.

Nikum khan Monaco Grand Prix-ah hian Sebastian Vettel chu pakhatna a ni a, 2011 hnuah helaia chak ber a nih leh hmasak ber a ni a. Monte Carlo khawpuia Circuit de Monaco-a intlansiakah hian lap 78 an tlan dawn a, lap khat zel hi 3.340 km a ni.

Copyright © inkhel.com 2024. All rights reserved.