Kum 16 hnuah Ferrari chu Monaco-ah pakhatna an ni leh ta a, pole atanga bul tan Kimi Raikkonen chu pakhatna ni thei ni mahse Ferrari team hotuten Vettel pakhatna an nih tir ni ngeia hriat theih turin pit stop an neihpui a, Vettel chu pakhatna a ni a, Kimi chuan dawntin, Red Bull driver Ricciardo chu pathumna a ni.

Lewis Hamilton chu qualifying-ah tyre leh khawl chian loh avangin 13-na atangin bul a tan a, heti chung hian 7-naah a inhlangkai a, Vettel chuan Driver Standings-ah point 25-in Hamilton lakah hma a hruai ta a ni. Kum 2001 khan Michael Schumacher chu Monaco GP-ah pakhatna niin, ani kha Monaco-a Ferrari pakhatna nihpui thei hnuhnung ber a ni a, khatih lai khan Vattel hi kum 13 a ni.

Inrinni qualifying-ah Raikkonen chu pakhatna niin, pole atangin bul a tan, a tlan tha hle a, mahse lap 34-ah pit-a koh luh a ni ta, hei aia tlaiah pawh lut se a car dinhmun a la tha a, hmahruaitu a nih bawk avangin hamthatna tam tak pawh a chan thei a beiseiawm. Hetih lai hian koh lut a ni a, car chak lo hnungah chhuakin, chak taka tlan turin dan beh a ni.

Hetih lai hian Vettel chuan theih tawpin dinhmun a lo siam tha hman a, Kimi pit-a a luh hnu lap 5-ah lut ve lehin, Kimi nen an lo inthlau hman hle a, a fal phah ta a ni.

Indianapolis 500-a Alonso a tlan avangin kum 2009 champion Button chuan McLaren car a khalh a, tunnel tlan luh dawnah Sauber driver Pascal Wehrlein nen an intai, Pascal car hi bangah a bet thlawp a, driver lu sawh zawng a ni bawk nen, hliam na tak a tuar dawn nia ngaih a nih laiin a him hlauh a ni.

Monaco GP race result

1. Sebastian Vettel, Ferrari

2. Kimi Raikkonen. Ferrari

3. Daniel Ricciardo, Red Bull

4. Valtteri Bottas, Mercedes

5. Max Verstappen, Red Bull

6. Carlos Sainz, Toro Rosso

7. Lewis Hamilton, Mercedes

8. Romain Grosjean, Haas

9. Felipe Massa, Williams

10. Kevin Magnussen, Haas

11. Jolyon Palmer, Renault

12. Esteban Ocon, Force India

13. Sergio Perez, Force India