Modric, Ronaldo, Salah: Tu hi nge tha ber ang le?

21st August 2018, 01:08AM

Luka Modric, Cristiano Ronaldo leh Mohamed Salah te chu UEFA Men’s Player of the Year dawng thei turin an sawr bing ta a. An pathum zinga tu emaw ber hian August 30 hian he chawimawina hi a dawng dawn a ni.

Season liam taa Champions League leh Europa League a club tel 80 atangain coach te bakah UEFA member aiawhin journalist 55 te chuan Europe khawmualpuia player tha an tih ber hi an thlang chhuak a, mi thahnem tham deuh hming a lut a, an thli fim chho zel a, a tawpah chuan Modric, Ronaldo leh Salah te chiah hi an awm tawh a ni.

Modric leh Ronaldo te hian tun hnai kum hnih chhungin he chawimawina hi an lo dawng tawh a, UEFA Champions League title chu a zawna a vawi thumna atan an pahnih hian Real Madrid an lakpui bawk a. Cristiano Ronaldo hi kum ruk chhung chu top scorer a lo ni tawh bawk a ni.

Croatia star Luka Modric hian Champions League title a lak hnuah Croatia chu World Cup-ah pahnihna a nihpui zui a, amah hian Golden Ball a dawng nghe nghe a. Mohamed Salah hian Liverpool chu Champions League-ah pahnihna a nihpui a, season liam ta kha Anfield-ah season khat a hmanna niin, inelna hrang hrangah goal 44 zet mai a thun a ni.

Antoine Griezmann chu palinaah a awm a, Atletico Madrid chu Europa League title a lakpui a, Russia rama FIFA World Cup khelhah khan France a champion pui bawk a. Panganaah Barcelona leh Argentina star Lionel Messi a awm a, Messi hian Barca chu Spanish League leh Cup title a lakpui a. Anni pahnih hian final an thleng chho ta lo a ni.

Top 10-ah hian Kylian Mbappe, Kevin De Bruyne, Raphael Varane, Eden Hazard leh Sergio Ramos te chu an lang a ni.

Hmeichhe lamah Pernille Harder, Ada Hegerberg leh Amandine Henry te chu a chungnung pathum an ni a. Mipa leh hmeichhe zinga tha ber chu UEFA Champions League draw neih hunah an puang ang.

Award shortlist dangte:
Goalkeeper of the Season: Alisson Becker, Gianluigi Buffon, Keylor Navas

Defender of the Season: Marcelo, Sergio Ramos, Raphaël Varane

Midfielder of the Season: Kevin De Bruyne, Toni Kroos, Luka Modric

Forward of the Season: Lionel Messi, Cristiano Ronaldo, Mohamed Salah

Women's Player of the Year: Pernille Harder, Ada Hegerberg, Amandine Henry

Europa League Player of the Season: Diego Godín, Antoine Griezmann, Dimitri Payet

Copyright © inkhel.com 2024. All rights reserved.