Tunlaia boxer ropui Anthony Joshua chuan MMA lama luh a sawi ri a, mi duh dan a nih chuan boxing atanga MMA lama inleh hi a hreh loh thu a sawi.
WBA, IBF leh WBO world heavyweight champion Joshua chuan ring chhuahsana octagon lam pan chu a chhia leh tha hriatnain a duh hunah a tihpuitlin tur thu a sawi a. Nakinah chuan a takin a thleng lo ang tih a sawi theih loh niin a sawi bawk.
US talk show host Conan O’Brien hmaah Joshua chuan, “Pawisa lampang vang pawh ni loin, miin an duh a, ka thinlunga luh duhna a len viau a, thutlukna dik ka siam nia ka hriat chuan octagon luhchilh hi ka thlang ang,” a ti a.
“MMA hi luhchilh duh ta ila, training uluk taka ka neih a ngai ang a, pawisa vang chauha tih ve chi a ni lo, thil tak tak a ni a, nak ruk tliak te leh hliam na tak tak neih inhuam a ngai,” a ti bawk.
A sawi zelnaah, “Nuam tih loh zawng a nih miau chuan sum siam tuma luhchilh peih chi a ni lo hrim hrim a. Ka chhia leh tha hriatna hian ka tana tha tur nia a ngaih chuan ka luhchilh mai ang,” a ti.
British boxer hian boxing atangin £43 million vel zet a hmu tawh a, London 2012 Olympics gold medal a lak atangin khawvelin an hmelhriat tan a, tunah chuan WBA, IBF leh WBO title a kawl tawh a ni.
Kum 28-a upa Anthony Joshua hian American boxer Deontay Wilder chu a hmachhawn leh theih hnaivai ber a ni a, engmah chiang erawh a la awm lo thung.