16 May 2018 09:50

Inkhel

Mizo Sports Website hmasa ber

​"MMA ka khel leh dawn, Jon Jones hmachhawn ka chak bawk"- Chuck Liddell

UFC light heavyweight champion hlui Chuck Liddell chuan MMA fight a neih leh tur thu a puang. Liddell hian UFC comeback fight-ah UFC light heavyweight champion hlui Jon Jones hmachhawn a chak thu a sawi. Liddell-a hian kum 48-na a hmang meka, hetia MMA-a a kir leh tur thu a puang mai hian mipui tam tak a barakhaih nasa hle a ni.

"Jon Jones hmachhawn ngei ka duh"-Chuck Liddell

UFC light heavyweight champion hlui Chuck Liddell chu Ariel Hewani-a'n a interview-naah Jon Jones nena Octagon-a innuai a chak thu a sawi a, kum lamah upa tawh viau mahse; chona lian takah a ngai thung. Liddell-a hi Octagon chhunga a insual hnuhnung berah Rick Franklin-a lakah a tlawm a, kum lamah upa tak ani chungin; insual a chakna chu a reh thei lovin a sawi. Jon Jones leh Chuck Liddell te hian UFC light heavyweight-ah chuan an tumpuite an hneh thei hle a, an lar vanglai tak a inan loh avang erawhin an intum thei ta lo a ni. A kutthlak nat avanga a hming lemah "The Iceman"-a an tih mai Liddell leh UFC fighter piang tawh zinga tha bera chhal ngam Jon Jones-a te inbei chu a hmuhnawm ngei ang.

"Liddell-a'n a duh phawt chuan ka inpeih reng"-Jon Jones

UFC light heavyweight champion hlui Jon Jones-a'n UFC Legend Chuck Liddell-a chuan hmachhawn a chak thu a hriat veleh a ngawi hle hle thei lo. Jon Jones-a chuan,"Putar Chuck, aia upate hi ka zah viau, nimahsela min hmachhawn i chak phawt chuan ka inpeih reng e,"tiin twitter-ah a ziak nghal.

Jon Jones-a chuan kum 2019 laihawl velah lo chuan an inhmachhawn hman a rinloh thu a sawi a, hei mai bakah hian Jon Jones-a hian damdawi hman phalloh a hman avangin engtik hunah nge Octagon-ah a inlan leh dawn a sawi theihloh. Mipui thunlungah chuan Jon Jones-a hian awlsam deuhin hnehna a chang ngei an ring awm e. Chutih laiin Liddell-a pawh hian chiang taka a hnek fuh chuan chak theihna a nei thung. Fighter pahnihte hi inbei ta se, pay per view-ah pawh sum tam tak lut ngei tura rin a ni. Fight thlir chakawm tak chu a ni chiang e.