​Mizoram Police FC in Venghlui FC an sawp

08th December 2016, 09:12PM

Mizoram Premier League Season 6 khel tur zawnna MPL Qualifier chu December 8, Ningani khan khelh tan a ni a, match hmasa berah Mizoram Police FC chuan 6-1 in Venghlui FC an sawp. 

MPL Qualifier khel tur hi Aizawl District Football Association atangin Mizoram Police FC leh Venghlui FC-te an ni a, Serchhip District Football Association atangin New Serchhip FC ten an khel bawk. MPL Qualifier-a team pathumte hi an inkhel kual chhuak ang a, chuta pakhatna chu MPL Season 6 khel turin an tling nghal ang. MPL Qualifier-a pahnihna leh MPL Season 5-a pasarihna (Ramhlun North FC) chuan MPL Play Off an khel thung ang.

01:00 PM Mizoram Police FC 6-1 Venghlui FC

(Lalfakawma 7', Lalramtharmawia 57', TC Vanlalhruaia 69', Lalfakzuala 85', V Laltanpuia 88' penalty, F Lalrinpuia 89' ) (C Lalmuanpuia 79')

Team pahnih inkhelah goal sarih lai a lut a, innkhelh tan atanga minute 7-ah Biaktea corner pet chu forward Fakawma chuan push lutin, Mizoram Police FC hmahruaina goal akhunga, goal dang luh belh lo in 1-0 a Mizoram Police hian hmahruaiin chawlhlawk an hmang ta a ni.

Second half-ah goal ruk lai a lut thung; tan atanga minute 12 aral hmain Mizoram Police FC tan free kick atangin midfielder Ramtharmawia chuan an goal hnihna a khunga, minute 69-ah defender Hruaia chuan an goal thumna akhung leh bawk.

Minute 79-ah Venghlui FC tan Lalmuanpuia chuan an goal khatna khung ve mahse, Minute 6 aral leh hmain Mizoram Police FC tan defender Rinchhana ball vawrh tha zet chu forward Fakzuala chuan tauh lutin, an goal lina athun leh nghal zat a, Fakzuala'n goal-a thun hnu minute 3 aral leh hmain penalty an hlawh chhuah atangin midfielder Tri-a chuan an goal ngana akhung leh ta a ni.

Tri-a'n penalty apet goal hnu minute 1 aral leh hmain Biaktea corner pet chu bench atanga lut Valpuia chuan tauh goal-in an goal 6 khung leh a, Mizoram Police FC chuan 6-1 in hnehna an chang ta a ni.

December 10, Inrinni RG Stadium Fixtures:-

01:00 PM New Serchhip FC vs Mizoram Police FC

December 12, Thawhtanni AR Lammual Fixtures:-

Venghlui FC vs New Serchhip FC

Copyright © inkhel.com 2024. All rights reserved.