June ni 4, 2018 (Thawhtanni) chawhma dar 11:00 khan Mizoram State Sports Council chuan infiammite inpui, MSSC Office, Upper Khatla-ah tun hnaia India ram inelna liana team champion, Mizoram Muaythai team lawmpuina hun a hmang.
May 18-21. 2018 chhung khan Himachal Pradesh khawpui pakhat Mandi-ah 18th Sr.National Muaythai Championship neih a ni a, Vallabh Govt. College Campus-a inelna lianah hian Mizoram Muaythai team chuan gold medal 9 leh silver medal 1 dawngin overall champion an ni a, Delhi chu pahnihna niin UP chu pathumna an ni.
Mizoram team lawmpuina hunah hian State Sports Council Secretary Pu C.Laltlanthanga chu khual lian a ni a, Council Secretary chuan Mizoram Muaythai Association hlawhtlinna a lawmpui thu sawiin an hmalakna kawng hrang hrangahte theihtawpa puih a inhuam thu a sawi. Khuallian chuan, " Players hlawhtlingte dawm zo leh dawm phak reng turin hruaitute pawh kan in update ve zel a ngai a, Federation-ah kan naute duhsak thei tur khawpa kan inhnimphum a ngai. Chutiang zelin coach te pawhin India ram huapah dinhmun sang zawk kan chelh chho zel tur a ni" a ti.
He huna thusawitu dang Brian Lalnunhlima, President, Mizoram Muaythai chuan, " India ram champion nih hi kan tum leh kan beisei lawk sa a ni a, kan thawhrimna leh inpeknate Pathianin mal a sawm a ni. India ram champion kan nih avangin kan player a tam thei ang ber International Event hmachhawn turin tirh kan tum ang" a ti a. October thlaah National Open championship thlen tumin Federation meeting-ah kan dil a, min pawmsak tawh nghe nghe a ti bawk.
Mizoram aiawh hian players leh team officials pahnih Coach V.Lalmuankima, Ramhlun North
leh Manager Andrew Lalnunmawia, Zonuam an kal a, Jeremia Lalchhuanmawia tih loh chuan gold medal an dawng vek a ni. Mizoram team hian May 27 khan Aizawl an lo thleng.
Below 48 Kg huangah Benjamin Zonunsanga, Luangmual chuan final-ah a khingpui Tripura players round 1 naah knockout in a champion. Semifinal ah Himachal mi a hneh bawk a, state 4 hnehin India ram champion a ni.
54-57Kg inelnaah Lalruatkima, Falkland Thuampui Muaythai Club chuan Final-ah UP player knockout a, semifinal-ah Delhi mi hnehin hemi hma hian Manipur, Telengana leh Tripura te a hneh.
Below 67 Kg huangah Ngursaimawia, Luangmual/Venghlui Muaythai Club chuan final-ah Rajasthan player a hneh a, semifinal-ah Delhi player ropui takin a hneh bawk. State 5 hnehin gold medal a dawng ve bawk.
Below 71Kg-ah Jeremia Lalchhuanmawia, Luangmual /Dawrpui Muaythai Club chuan
Final-ah Delhi player a hneh lo a, Hemi hma hian West Bengal, Karnataka leh Manipur a hneh a.
Below 85Kg-ah Lalthasanga Lelhchhun, Venghlui chuan Final-ah Haryana mi knockout in a champion a, hemi hma hian state pali hnehin final a lut a, gold medal a la bawk.
Lalhlimpuia Pautu Zonuam/Mizoram Police chuan 85-90Kg final-ah Jharkhan mi a knockout a, State 4 hnehin 18 Sr. National-ah a champion a ni.
Ngurlianzuala Sailo, 3rd MAP/Dawrpui Muaythai Club chuan 91above Kg final-ah Jarkhan mi hnehin a champion a, semifinal-ah Haryana mi a hneh ve bawk.
Hmeichhe inelna below 48 Kg huangah Lalvenhimi, Bethlehem Vengthlang/Dawrpui Muaythai Club chuan final-ah Manipur player Unanimous decision hmangin a hneh a, hemi hma hian Telengana, West Bengal, Karnataka leh Delhi mite a hneh a.
Zohmingsangi, Darlawn/Dawrpui Muaythai Club chuan below 54 Kg-ah Final-a a khingpui Delhi player chu round 3-naah knockout in State 5 hnehin below 54-ah a champion.
Liansangpuii Renthlei, Zemabawk/Mizoram Police chuan below 67 Kg final-ahg Rajasthan player chu Unanimous decision hmangin a hneh a, state hnehin a champion ve bawk.
Mizoram Muaythai team lawmpuina hun hi Rosangliana, Administrative Officer chuan a kaihruai a, Mizoram team player leh official te hnenah MSSC chuan lawmpuina thilpek a hlan leh theuh a ni.
(adsbygoogle = window.adsbygoogle || []).push({});