April ni 25, 2017 khan Lal Thanhawla Auditorium, Aizawlah Mizoram Fight League khuhhawnna neih a ni a, he function-ah hian MMA lama tui an kalkhawm thahnem hle. MFL hi Mizoram State Mixed Martial Arts Association leh Zonet Cable Pvt. Ltd. tangkawpin a buatsaih a ni a, June thla chawhnu lam atanga neih tan tur a ni.
Lalbiakdiki chuan he khuhhawnna hun hi hneh takin a kaihruai a, DGP Pu Lalthianghlima Pachuau chu khuallian niin; khuhhawnna a nei a, Mizoram State Sports Council Sports promotion officer Pu Thangchungnunga chuan MFL Hand Book a tlangzarh bawk a ni.
Technical chairman Samuel Lalrozama Hmar chuan MFL chungchang sawifiahin, "UFC leh fight league dang dang kan lo en tawh thin a, heng kan en ho hi chu professional an nih avangin khatiang kha kan rilruah a lo awm a ni maithei, Mizoram Fight League erawh Amature Mixed Martial Arts a ni dawn.
"MMA hi bul kan tan chho chauh a ni a, hetah hian fighter tawnhriat la ngah lo tak tak te sa himna kan ngaihtuah avangin amature nise kan ti ta a ni. Amature ah chuan kiu leh khup a hman theih lova. Tin, shin guard an vuah dawn bawk. A bak a dangah chuan professional fight dan ang kha a ni vek tawh dawn tho a ni," tiin a sawi.
Mizoram State Sports Council Sports Promotion officer Pu Thangchungnunga chuan," Mizo thalaite; taksa chak leh rilru huaisen takte inelna tur Mizoram Fight League neih tur hian eizawnna tha tak thalaite tan hawng chho se, chumi atana pawimawh tak Hand Book hi ka hawng e," tiin MFL Hand Book a tlangzarh a ni.
Khuallian DGP Pu Thianghlima Pachuau chuan, "Mizoram chhungah Fight tak tak kan hmu ve thei dawn ta a, technical lamah theih tawpa kan tan chhoh a ngai dawn a, arts hrang hrang pawh trainers tha tak tak kan mamawh chho zel dawn. Team neitute hian trianers tha tak tak ruai zel se ka duh khawp mai.
"Eizawnna tha kan hawng chho zel dawn niin a lang a, ka lawm khawp mai. Fighters mai bakah trainers tan eizawnna a awm chho dawn. Mizoram Football-in nasa takin hma a sawn, ka lawmpui em em, hetih lai hian MMA hi Football ang maiin Mizoramah hian a lar chho ngei ang tih hi ka ring tlat a ni," tiin a sawi.
He Fight League-ah hian Team an awm dawn a, team liah then niin, BCA Brawlers, Promise Strivers, DSZ Fight Club leh Juggernaut MMA te chuan team hi an lei hlawm a.
BCA Team Assistant Secretary Lalrinawma chuan, "MMA hi Mizo zingah nasa takin a lar a, ngaina kan tam em em, mipui chochhuah nan he team hi kan din ta a ni," tiin a sawi.
Promise Strivers Gen. Secretary Vanlalzarzoa chuan, "Kan pawlin kan tum ber chu Zoram thalaite'n rilru leh taksaa hma nasa taka kan sawn theih nana hma lak a ni a. Eizawnna leh hmasawna hrang hranga Mizo thalaite dawm kangtu nih kan tum avangin MFL Team neitu nih hi kan tum ta a ni," tiin a sawi.
DSZ Fight Club Director K. Lalhmachhuana chuan, "MMA lamah hian kan mikhual lova, kan president pawh hi fighter lo ni tawh thin a ni. Kan team-in kan tum ber chu Mizo Fighter tha tak tak promote hi a ni a, chu chu MFL-a team kan rawn neih chhan ber a ni bawk," tiin a sawi.
Juggernaut MMA President Lalromawia chuan, "A hmasain kan team hming hi Dota atanga kan lak a ni a, kan hero hman nuam tih ber pakhat kan rawn thlang a ni. Mizo thalai taksa chak leh buaina chawh chhuah chak em em te chu kawng dik an zawh theih nana ke pen a ngai tih kan hriat avangin thalaite kawng dik zawhtir chu MFL-a team kan rawn lei chhan chu a ni," tiin a sawi bawk.
Team liah then niin, fighters draft sa vek a ni a, chung team set sa te chu team leitute chuan an thlang ta a, hetiang hian :
Team 1 : Juggernaut MMA
Color : Red
Captain : Ngurlianzuala Sailo
Team 2 : Promise Strivers
Color : Green
Captain : Dengthanchhunga
Team 3 : DSZ Fight Club
Color : Black
Captain : Lalchhuanmawia
Team 4 : BCA Brawlers
Color : Blue
Captain : Lalthansanga Lelhchun
Mizoram State Mixed Martial Arts Association President Pu Lalthakima chuan, "Pathian hnenah lawmthu ka sawi a, Pathian avang chauha hetiang buatsaih thei hi kan ni. Kan Association kalchhoh zel dan leh tun kan thlen theih nan hian mi tangkai tak tak an awm a, chung mi pawimawh tak takte chu zanina kan sawm bikte hi an ni a. Fight League tha tak kan neih theih nan Fighter te in lo inenkawl tha dawn nia. Tin, mascot mawi tak, a hming 'Pasaltha' hi Rotlinga siam niin, a chungah lawmthu kan sawi bawk. A tawp berah chuan Zonet Cable Pvt. Ltd chungah kan lawm em em a, event changtlung tak kan neih theih dan thalaite tan ke an rawn pen chhuak a, an chungah kan lawm tak zet a ni," tiin lawmthu sawina hun a hmang a ni.
Source : Mizoram Fight League FB Page