Coimbatore-ah leh Chenai-a Bike in tlan siak chu July ni 9, Pathianni khan zawh fel a ni a, Mizo Riders te an che tha hle a, Trophy 5 an dawng.
July ni 8, Inrinni Gixxer Cup intlansiakah podium lawn pha lo Malsawmdawngliana chu pahnihna a ni a, Lalmawipuia Bawngkawn chu pathumna a ni ve bawk.
Mizo rider fehchhuakte hi track puitlinga tawnhriat la nei lo an ni hlawm a, Suzuki Road to Rookie Cup leh Suzuki Gixxer Cup-ah hian Race one leh Race two ah Mizoram MotorSports Association (MiMSA) tirhchhuah Mizo rider te chuan trophy 5 an dawng a, hei hi bul tanna chauh a la nih avangin an phur hle.
Second round hi August-ah neih a ni leh dawn a, MIMSA chuan result tha zawk hawn ngei tumin 1st round-ah hian rider hlangin an kal ang a, second round-ah erawh MIMSA Official-ten Mizo rider-te hi an hruai thung ang.
Coimbatore-a Suzuki Gixxer Cup-ah Lalmawipuia, Bawngkawn chu pathumna a ni a, Malsawmdawngliana, Kanan chuan lawmman a dawng phak lo chiah a, 4-na a ni. Lalruatsanga, Tuikual chu 9-na a ni phak ve bawk.
JK Tyre, Road to Rookie Cup-ah Lalhruaizela, Bawngkawn chu pahnihna a ni a, K.Lalnunsanga, Electric Veng chu pathumna niin podium a chang phak bawk. PC Andy Lalhmangaihsanga, Rulchawm chu 4-na a ni a, Vanlalthlamuana, Salem veng chu 5-na a ni a, Lalneihtluanga, Salem veng chu 6-na niin Augustine Laltlankima, Lalrinliana, Melriat chu 7-na a ni.
F.M.S.C.I. One Make Race chu Chennai-ah tlan a ni a, Tvs Apache 200-ah Anthony Lalawmpuia, Mission Vengthlang chu 4-na niin Lalhmingchuanga Sailo chu 12-na a ni. Honda Cbr 150 inelnaah J.Lalhruaipuia, Tlangnuam Vengthar chu 9-na niin David Lalfakzuala, Khatla chu 12-na a ni a, Lalringngheta, Keifang chu 16-na a ni. F.M.S.C.I. One Make Race-ah hian Bike chi hnih CBR Honda leh TVS Apache-ahte inelna neih a ni a, Mizo rider-ten lawmman an la phak lo a ni.
FMSCI Onemake race-ah hian Honda Cbr150 class-ah Honda Company lamin riding suit an pekchhuah tlai avangin Mizo riders-te grid-ah in tlar hman lova, pit lane atangin bul tantir an ni. Lalringngheta chu 9-na a ni laiin a tlu a, intlansiakah a tel tluan ta tho. Tin, Road to Rookie Cup-ah V.Lalhlimpuia chu disqualify a ni a, Zothanmawia pawh a bike chhiat vangin race a tlan tluan thei lo bawk.
July ni 8, Inrinni khan Race 1 an tlan a, July ni 9, Pathianniah Race 2 tlan zui leh a ni a, Road to Rookie Cup-ah Lalhruaizela, Bawngkawn chu pathumna a ni. Hruaizela hian trophy pahnih a dawng.
Mizo riders ten hlawhtlinna an chan theih nan hian LBS Suzuki, Bawngkawn leh Mizoram State Sports Council chungah MIMSA chuan lawmthu an sawi.
(adsbygoogle = window.adsbygoogle || []).push({});