21 Apr 2017 04:31

Serchhip Chelsea

Mizo mipuite inpekna a fakawm - Bagan coach

Mohun Bagan head coach Sanjoy Sen chuan Inrinnia an hmachhawn tur Aizawl FC a fak a, Mizo mipuite inpekna pawh a hmuh hmaih lo va chak ngei an tum tih a sawi.

Kolkata club hian I League-ah hmahruai mek mahse an hmahruai dan hi a nghet lo riau va, Inrinnia an hmachhawn tur Aizawl FC nen hian point 33 ve ve an nei a an inkhelhna hmasaa an chak vangin pakhatna dinhmun hi an hauh.

Aizawl Press Club-a thuthar lakhawmtute'n an kawmnaah Mohun Bagan coach Sanjoy Sen chuan, "Aizawl hi nuam ka ti a, kan inkhelhna turah pawh training kan nei tawh."

"Season hmasaa kan lo zin khan technical area-ah team ka ho thei lo va, mahse Mizo mipuite inpekna erawh ka hre reng a ropui ka ti. Inrinni pawh hian kan hmu leh ngei ang." tiin a sawi.

2014-2015 season I League-a champion team Mohun Bagan hian tun season-ah khualmuala an khelhin hnehna an chang tam lo va, khualmualah an tumpuite vawinga an draw tawh.

Khualmualah hnehna chang tam lo mahse Bagan coach chuan an sulhnu țha lote a ngaihtuah ber lo tih a sawi a, table-a an dinhmun a pawimawh ber tih a sawi.

Sanjoy chuan, "Result chhia kan neih tawhnate ka ngaihtuah lem lo va, table-ah a chungber kan ni a hei hi a pawimawh. I-League-a kan champion pawh khan khualmualah a ni a, football-ah chuan khualmualah pawh point thum hlawhchhuah theih a pawimawh." tiin Aizawl FC lakah tlawm an tum lo.

Inrinnia an hmachhawn tur Aizawl FC hian season liamta khan I-League an mangțha hman a , mahse season thar țan hmain kohkir leh an ni a beisei phak bakin an che țha chho.

Sawi zelin Sanjoy chuan, "Keima lamah chuan tih theih a tam dawn lo va player-te hi inkhel tur an ni. Aizawl FC kal zel dan hi a ropui khawp mai a, Churchill Brothers pawh khualmualah si thum faiin an hneh a keini chuan khualmualah Churchill Brothers hi kan hneh zo lo."

"Football-ah hi chuan chak zawk tura rin a neih theih a, mahse sawilawk a harsa thung. Aizawl FC hian pressure an nei ngah zawkin ka ring." tiin an hmachhawn tur team hi a ngainep lo hle.

Prayag United head coach hlui hian Mizo player-te thiamna pawh a hmuh hmaih lo va, nakin lawkah chuan an hmachhawn tur Aizawl FC pawh hian India tana khel pha player an neih chhoh a ring.

Sanjoy chuan, "I League club-ah Mizo player an ther fur a mahse Indian national team-ah Aizawl FC player an tel miahlo thung. Hun lokal leh turah erawh ram tana khel pha player an neih teuh ka beisei."

"Season liamta khan Fedederation Cup final an lut a tun season-ah pawh champion thei dinhmunah dingin inpekna thuk tak a awm." tiin Aizawl FC hi a fak.

Mohammedan Sporting pawh lo enkawl tawh țhin Sanjoy hian tun season I-League hi season an hmachhawn tawh a khirh ber ala ni tih a sawi tel a, Inrinni hian chak an tum ngei dawn tih pawh sawilangin football-ah hian engpawh a thleng thei tih a sawi bawk a ni.

AIZAWL FC vs MOHUN BAGAN

A hun : 22nd April, 2017 (2:00pm)

A hmun: Rajiv Gandhi Stadium, Aizawl

Live-na tur: Ten 2